Vivian Motzfeldt (S), Erik Jensen (S), Kuno Fencker (N),
Pipaluk Lynge (IA), Qupanuk Olsen (N) tamarmik filmip Orsugiak - Grønlands
hvide guld - arfininngornermi februaarip arfineq-pingajuanni
takuteqqaarneqarnerani peqataapput.
Naalagaaffeqatigiinnermut Nunanullu Allanut
Naalakkersuisuusimasoq Vivian Motzfeldt killitsinnartumik inuulluaqqusivoq,
taassuma filmimi aatsitassarsiorfiit ilaasa sammineqarnera nuannaarutigalugu
Katuaq qimappaa, taamaakkaluartorli naalagaaffeqatigiit pisuussutinik allanik
misissuinernik amerlanerusunik kajumissaarivoq.
Vivian Motzfeldt (S), Erik Jensen (S), Kuno Fencker (N),
Pipaluk Lynge (IA), Qupanuk Olsen (N) tamarmik filmip Orsugiak - Grønlands
hvide guld - arfininngornermi februaarip arfineq-pingajuanni
takuteqqaarneqarnerani peqataapput.
Naalagaaffeqatigiinnermut Nunanullu Allanut
Naalakkersuisuusimasoq Vivian Motzfeldt killitsinnartumik inuulluaqqusivoq,
taassuma filmimi aatsitassarsiorfiit ilaasa sammineqarnera nuannaarutigalugu
Katuaq qimappaa, taamaakkaluartorli naalagaaffeqatigiit pisuussutinik allanik
misissuinernik amerlanerusunik kajumissaarivoq.
- Oqaluttuarisaanermi nunatta pisuussutaanik piiaanerit
uagut avaqqulluta pisut uagullu aalajangeeqataaffiginngisagut filmimi
takutinneqarput
- Pisuussutinik taakkuninnga atuineq ukiuni qulikkuutaani
arlalinni naleqartorujussuusimavoq, taamaammat maanna naligiissitsinissaq
pisariaqarpoq. Kalaallit Nunaat nammineernerulerniarluni ukiorpassuarni
akiuuttarpoq, aqqutaanilu navianartorsiortarluni. Oqaluttuarisaanermi
siuaasagut aamma pingaannginnerusutut misigisimapput, Vivian Motzfeldt oqarpoq.
Kalaallit Nunaat Danmarkimut aningaasartuutaannaanngitsoq
partiimi siulittaasuata Erik Jensenip erseqqissarpaa.
- Kalaallit Nunaat pinngortitami pisuussutinik
pisuussuteqartoq, Danmarkillu aningaasartuuteqaannarsimanera ilumuunngitsoq
filmimi takutinneqarpoq. Filmip aallartinnerani ministeriuneq Anders Fogh
Rasmussen Kalaallit Nunaat pillugu sakkortuumik oqaaseqartoq takuarput.
Piviusulersaarut isiginnaassagaa uisitaassasorlu neriuppunga. Kalaallit Nunaat
Danmarkimut iluaqutaasimavoq. Allanik aatsitassasrsiorfeqarpoq, soorlu
Maarmorilik aatsitassarsiorfiillu allat misissuiffigineqarsimanngitsut
qulaajarneqarsimanngitsullu, aalisarnermilu Nordafari, Illersornissaqarfiup
Pituffimmiinnera. Kalaallit Nunaat namminiilivinnissamut imminullu
pilersornissamut periarfissaqartoq Filmimi takutinneqarpoq, Erik Jensen (S)
oqarpoq.
Oqaasissaqanngitsut
Qupanuk Olsenip (N) nunasiaanerup kinguneri, aningaasallu
inuiaqatigiinnut iluaqutaavallaanngitsut piviusulersaarummi takugamigit
killitsissutigaa.
- Piviusoq misigisimajuarsimasarput filmimi
uppernarsarneqarpoq. Filmi qujamasuutigaara. Arsummiut aningaasarsiorluartartut meeraalluta tusartarnikuuarput. Uanga
nammineq imarsiortutut sakkutuujunikuugama Ivittuut tikeraarnikuuara, malugisinnaanikuuaralu
aningaasarsiorfiusimasoq. Aammali aliatsaatigaara, salluliorfigineqarsimanerpummi filmimi
uppernarsarneqarpoq. Aningaasat uagutsinnut iluaqutaasussaagaluit uagut
peqataanngitsugut tiguneqarsimapput. Nammineq nunatsinni
oqaasissaqanngilluinnarsimavugut. Misigissuseq tamanna suli
attortissutigaarput, filmilu killitsissutigeqaara, Qupanuk Olsen oqarpoq.
Qallunaat naalagaaffimmiit tapiissutit Kalaallit Nunaata
namminiilivinnissaanut akornutaasutut atorunnaartariaqaraat Kuno Fencker,
filmip takuteqqaarneqarnerata kingorna Siumumiit Naleqqamut nuuttoq,
isumaqarpoq.
- Namminiilivikkutta naalagaaffimmiit tapiissutit,
Danmarkimi ilinniagaqarsinnaaneq peqqinnissaqarfimmullu tapiissutit
atorunnaarsinneqarumaartut Danmarkimit oqarfigineqartarpugut.
Sioorasaarneqartarpugut, qunusaarneqartarluta mianersoqquneqartarlutalu. Tamanna
maanna unitsinneqartariaqarpoq. Naligiissitaalluni suleqatigiinneq
aallartittariaqalerpoq, Kuno Fencker oqarpoq.
Maanna naligiisitsisoqalerli
- Qallunaat nunatsinnik arlaatigut iluaqutiginnittut
tamatta nalunngilarput. Filmimili tamanna ersarissumik takutinnearpoq – aamma
taamaallaat aatsitassarsiorfimmit ataasiinnarmiit. Danskit uagutsinnut
isiginnittaasiat nipaallu – ”akissaqanngikkussimi qaqugummi
namminiilivissagassi?” – taamaatinneqartariaqarput. Danskit
oqaloqatigigaangatsigit naligiissumik atugassaqartinneqartariaqarpugut.
Naligiippugut. Arlaannarpulluunniit naleqarnerunngilaq. Suleqatigiinneq naligiissumik tunngavilik pissaaq,
Pipaluk Lynge (IA) oqarpoq.
Kalaallit Nunaata
namminiilivinnissaanut aningaasaqarnikkut periarfissat oqallisigineqarneranni
ataatsimoortumik tapiissutit puiorneqartariaqartut, taarsiullugulu Ivittuuni
kryolit-imik piiaaffiup kingorna akiliinissamut aaqqissuussinertut
isigineqartariaqartut Inuit Ataqatigiit siulittaasuat Múte Bourup Egede
qallunaat tv-aviisianni oqarpoq.
