Suliassaqarpallaarnermiit aningaasaqarnikkut ajornartorsiornermut

Suliffissaaleqinermik eqqugaasut amerliartoqqilerput, akileraarutitigut isertitat appariartorput illuatungaanilu pisortat aningaasartuutaat suli qaffakkiartorlutik, maannamullu erseqqissinngilaq malunnaatilimmik allannguutissat aningaasaqarnermullu patajaallisaataasussat sorpiaassanersut, Naalakkersuisulli erseqqissaapput sipaarniartoqassasoq tamatumalu saniatigut kaammattuutigaat inuiaqatigiittut "aningaasarsiullaqqinnerusariaqartugut".

Aana takussutissiaq, aningaasaqarnermut akileraartarnermullu Naalakkersuisup, Múte Bourup Egedep (IA) marlunngornermi tusagassiortunik katersortitsinermi saqqummiussaa:

Iliuusissanut aningaasartuutaanerusussanut akissaqannginneq

Ukioq manna Inatsisartunut kiisalu kommunalbestyrelsinut qinersisoqarpoq. Pingaartumik Inatsisartunut qinersinissaq sioqqullugu partiit innuttaasunut neriorsuutinik angisuunik saqqummiussipput, tassanilu innuttaasunut aningaasaqarnikkut ajornartorsiortunut oqilisaassissallutik, taamaalilluni ulluinnarni inuuneq ajornannginnerulersinneqassasoq aammalu periarfissaqarfiunerulissasoq neriorsuisoqarluni.

Taamaakkaluartoq partiit aammalu minnerunngitsumik innuttaasut tamanna puigorallarsinnaarpasippaat, maannakkullu qinersinerup kingorna Inatsisartuni ataatsimiinnerup siulliup aallartinnissaanut, tassalu ukiakkut ataatsimiinnerup 2025-mi, 19. september 2025 aallartittussamut isumalluartoqarpallaarsinnaanngilaq.

Nunarput aningaasaqarnikkut ajornakusoortorujussuarmi inissisimavoq, Naalakkersuisullu ersarissaanerat imaappoq:

• Nunatta Karsiani uninngasuutit aarlerinartumik appasipput.

• Nutaanik annertuunik isertitassanik ilimanartoqanngilaq.

• Aningaasartuutigulli amerliartuinnavipput. Taamaammat pisarnitsitut iliuinnarsinnaajunnaarpugut.

Maannakkut Inatsisartuni ilaasortat siunnersuutaat tamarmik ukiakkut ataatsimiinnermut Inatsisartut siulittaasoqarfiannit suliarineqarput. Partiillu siunnersuutiminnik iluatsitsisinnaassagunik aamma siunnersuutiminnut aningaasanik matussutissaasunik nassaarniartariaqarput.

Akileraartarnikkut iluarsartuussineq 300 millioner koruunit sinnerlugit nalilik

Naalakkersuisut nalunaarutigaat, aningaasartuutissanut politikkimik erseqqissumik sukannersumik tulleriiaarinnittumillu ingerlatsisoqartariaqartoq, missingersuusiortarnermut naatsorsuusiortarnermullu inatsimmut ataqqinnittumik, aammalu aningaasanik tigoriaannarnik aallussinermik ingerlatsisiffiusumik. Taamaakkaluartoq, aningaasarsiornikkut ineriartornissamut aammalu atugarissaarnissamut qulakkeerinninnissamut, pisortat aningaasaliissutaannik pisariaqartitsisoqartussaasoq.

Qinigaaffiup siuliani akileraartarnermut iluarsartuussineq aallartinneqarpoq, tassanilu sulinermut ilanngaat (Suila-tapit) atulersinneqarpoq aammalu akileraartarnermut ilanngaat qaffanneqarlutik. Tamanna innuttaasunut 300 millionit koruuninik naleqartumik oqilisaassivoq, kisianni nunap aningaasaqarneranut tamarmut nammakkiilluni.

Naalakkersuisut qinersinermi kingullermi aalajangiunneqareersimasut, soorlu sulinermut ilanngaat, uterteqqinneqarsinnaanersut apeqqutigigatsigu, aningaasaqarnermut Naalakkersuisup naaggaarpaa:

- Naamik, sipaarniarnermut atatillugu innuttaasunit aningaasanik tigooqqaasoqassanngitsoq Naalakkersuisut pingaartilluinnarpaat, taamaattumik pilersaaruteqarpugut namminersorlutik oqartussat iluanni sipaarniarnissamik. Uannut pingaaruteqarpoq erseqqissassallugu, inatsisitigut pisussaaffiusunik sipaarniartoqanngitsoq, kisiannili ingerlatsinermut aningaasartuutinit sipaarniartoqassaaq.