Suliffeqarfik aallarterlaaq takornarialerisunut nersornaasiuttakkamik tunineqartoq
Greenland Tourism Awards Nuummi suliffeqarfimmut Raw Arcticimut ukioq manna nersornaasiunneqarpoq. Suliffeqarfik siorna aallartittoq pinngortitamik kulturimillu ataqqinnilluni angallassisarnermigut pitsaasunik pilersitsisimanertik pillugu nersornaaserneqarpoq.
Raw Arcticimeersoq Isak Brandt Hansen qeqqaniippoq. Visit Greenlandimeersoq Tupaarnaq Tróndheim Air Greenlandimeersorlu Katja Vahlilu sanianiipput.
Assi: Air Greenland / Visit Greenland
Visit Greenlandip Air Greenlandillu ukiumoortumik Greenland Tourism Awards-imik nersornaasiuttagaat takornarialerisunut inuussutissarsiortunit allanit isumassarsiorfigineqarsinnaasunut tunniunneqartarpoq.
Nersornaat ukioq manna Nuummiittumut Raw Arcticimut tunniunneqarpoq. Nersornaasiinermut ima tunngavilersuisoqarpoq:
- Raw Arctic qaammatit 15-iinnaat matuma siorna pilersinneqarpoq. Taamaakkaluartorli pilersitsisut pingasut tassaasut Rasmus Brandt, Isak Brandt Hansen aamma Casper Frank Møller anguniagartik piviusunngortinniarlugu piffissami sivisuumi suliniuteqarput: pinngortitap aamma piorsarsimasutsitta ataqqineqarluartumik misigisassarfiulernissaa - piujuartitsineq qitiusumik naleqartitaralugu.
- Tamanna iluatsilluarpoq, soorlu niviugaasalerluni qissassinissamik, arfernik takornariartitsinissamik, piniartitsinissamik, arsarnerinik misigisassarsiortitsinissamut, inuilaarsuarmiisitsinissamut kiisalu atuisunut tulluarsakkanik pilersaarusiorluni angallassisinnaanissamik neqerooruteqartitsinikkut - qanilaarnermik aamma pitsaassusermik ukkatarinnittumik. “Catch-and-release”-mik taallugu aalisarnerit, seqerngup nukinganik ingerlataqartumik unnuisitsinerit, aamma silap pissusiata allanngoriartornera malillugu atorfinititsinerit, sulisunik pikkorissaasarnerit ingerlanneqartarnerinik takornarissanut paasissutissiissutigisarpaat.
Suliffeqarfiit 32-t nersornaammut innersuunneqarput, taakkunanngalu pingasut aalajangiisussanut innersuunneqarlutik. Raw Arcticip saniatigut Diskobay Tours aamma Authentic Greenland nersornaammut innersuunneqarput.
Ajugaasoq Kim Kleist Eriksenip qiperugaanik Air Greenlandimiillu angalanissamut 10.000 koruuninik nalilimmik tunissutisiaq tunniunneqarput.
