Suliffissarsiortut 300-ngajannik amerleriarput: Naalakkersuisut ernumanngillat
Ukiup siulianut sanilliullugu oktobarimi 2024-mi suliffissarsiortut 288-inik amerleriarsimapput. Suliffissarsiortunut ikiorsiissutit pillugit Inatsisartuni inatsit nutaaq tamatumunnga pissutaaqataasoq, Naalakkersuisoq nassuiaavoq.
Sanaartorneq
Assiliisoq Leiff Josefsen
2024-mi oktobarimi suliffissarsiortutut nalunaarsukkat 1.313-iupput. Ukiup siuliani qaammammut tassunga sanilliullugu qaffariarnerujussuuvoq, tassanimi suliffissarsiortutut nalunaarsukkat 1.025-usimapput. Nuna tamakkerlugu 288-inik amerlisimanerannut pissutaasoq pissusissamisoortoq, Isumaginninnermut, Ilaqutariinnermut, Suliffeqarnermut Nunamullu Namminermut Naalakkersuisoq Jess Svane (S) isumaqarpoq.
Oktobarimi 2023-mit 2024-mi oktobarimut suliffissarsiortutut nalunaarsukkat kisitsisaat.
Najoqqutaq: Kalaallit Nunaanni Naatsorsueqqissaartarfik
- Maannakkut aaqqissuusseqqinnerup sunniutai takuneqarsinnaanngorput, suliffissarsiortunut kisitsisit allanngoriartulermata. Allanngoriartorneq nutaajuvoq, ingerlaannarnissaalu pillugu Naalakkersuisut malinnaaffigeqqissaarniarlugu naatsorsuutigalugu, Jess Svane oqarpoq.
Suliffissarsiortunut ikiorsiissutit pillugit Inatsisartut inatsisaat nutaaq aapparisap isertitaanik apeqqutaatitsinngilaq, qulakkeerinermik ikiorsiissutaammata. Taamaattumik 1. januar 2024-miit suliffissarsiortunut ikiorsiissutinik pisartagallit ilapput. Suliffissarsiortunut ikiorsiissutinik pisartagaqalersut siusinnerusukkut pisortanit ikiorsiissutinik pisartagaqarsimapput.
Imminut pilersornerunissaq
Suliffissarsiortut pillugit inatsimmi piumasaqaat nutaaq tassaavoq suliffissarsiortut kommunimit ikiorsiissutinik pisartagaqassappata iliuusissatut pilersaarusiortariaqarnerat, qaammatit pingasukkaarlugit malinnaaffigineqartartussamik.
- Taamaattorli allannguuteqarnissaq Naalakkersuisut naatsorsuutigaat, suliffissarsiortunut ikiorsiissutit ikiorsiissutaasunut pisoqqatulli, suliffeerunnermi ikiorsiissutitut, piffissamik killiligaanngitsutut ikiorsiissutaanngimmata.
- Immikkoortuni pingaaruteqartuni arlalinni sulisussaaleqiffiusumi, suliffissaqartitsinermut annertunerusumut imminullu pilersornerunermut sinaakkutissat pitsaanerusut pilersinnissaannut qanoq iliussanerluta, Naalakkersuisut borgmesterinik oqaloqateqarnissamut ammapput, Jess Svane oqarpoq.
