Sullissinermi akiliutinik Peqqinnissaqarfik nalimmassaaniarpoq
Peqqinnissaqarfiup sullissinermi akiliuterpaaluit nalimmassarniarpai, taamaattumillu nalunaarut nutaaq tusarniaassutigineqarpoq.
Peqqinnissaqarnikkut sullissinermi akiliuterpaaluit nalimmassarneqarniarput.
Assiliisoq: Leiff Josefsen
Aallaaviatigut peqqinnissaqarfiup sullissineri akeqanngillat, taamaattorli sullissinerit ataasiakkaat akillit nalunaarutikkut malittarisassiorneqarput.
- Siunnersuut tusarniaassutigineqareernikuuvoq, akilli akiliutaasartut toqqammavigalugit akigititat aaqqissuuteqqinneqarnerat pissutaalluni tusarniutigeqqinneqarluni, tusarniaanermi paasissutissani ilisimatitsissutaavoq.
Nerisaqarnernut aningaasartuutit
Akigititat allanngortinneqarnerisa saniatigut, napparsimasut peqqinnissaqarfiup avataani najugaqartut peqqinnissaqarfimmit innersuunneqarsimasut nerisassaannik akiliisarneq pillugu nutaamik malittarisassaliortoqarpoq.
- Napparsimasut najugaqarfimmi avataani
misissorneqarnerani katsorsarneqarneranilu kiffartuussinerit pillugit nalunaarut
naapertorlugu illoqarfimmi nunaqarfimmiluunniit allami najugaqartut
unitsinneqarnatik nakorsiartut akeqanngitsumik nerisaqartinneqarsinnaatitaasut, peqqinnissaqarfiup avataani nerisaqartinneqarnissamut
periarfissiinani inissinneqarsimasut ullormut akiliutinik peqqinnissaqarfimmit tunineqarnissaminnik
pisinnaatitaaffeqarput. Ullormut
akiliutissat 270 koruuninut aalajangersarneqarput, tassani nerisaqarnernut
aningaasartuutit tamarmik ilaatinneqarput, nalunaarummi nutaami allassimavoq.
DNA-mik misissuineq
Aalajangersagaq alla tassaavoq dna-mik misissuineq, taannalu 1.400 koruuninik akeqalernissaa siunniunneqarpoq.
Akigititat nutaat takujumallugit una tooruk.
Tusarniaanermut piffissaliussaq tassaavoq novembarip 15-iat.
