Sullitat inuussutissarsiortut BankNordikip naatsorsuutai amigartoortingaarpaat
Banknordikimi sullitat inuussutissarsiortut ataasiakkaat aningaasatigut ima ajornartorsiortigipput, allaat aningaaserivik aningaasanik appartitsingaatsiartariaqarluni, tamannalu aningaaseriviup naatsorsuutaanut sunniuteqarnerluppoq.
2024-mi qaammatini siullerni pingasuni 19 millionit koruunit sinnerlugit Banknordik amigartooruteqarpoq.
Assi: BankNordik
2024-mi qaammatini siullerni pingasuni Banknordikip naatsorsuutaani 19,478 millionit koruuninik amigartooruteqartoq takuneqarsinnaavoq.
Ukiup siuliani qaammatini siullerni pingasuni 5,769 millionit koruuninik akileraarutit suli ilanngaatiginagit sinneqartoortoqarneranut sanilliullugu, Kalaallit Nunaanni aningaaseriviup naatsorsuutai 25 millionit koruuninik ajornerulersimapput.
- Naak piffimmi matumani pissutsit ingerlalluaraluartut, siornatigornit appartitsinerit annertunerulersimapput. Appartitsinerit annertusinerat naatsorsuutigineqareersimavoq, tamatumunnga ilaatigut peqqutaavoq sullitat inuussutissarsiortut ataasiakkaat ajornartorsiornerat, appartitsinerit pillugit malittarisassat malillugit annaasaqarsinnaanerinik ilimasuutit appartitsinernut ilannguttussaagatsigit, aningaaserivik ilisimatitsivoq.
Pisortaaneq isumalluartoq
Aningaaserivimmili pisortaanerup Turið Finnbogadóttir Argep Kalaallit Nunaanni aningaasarsiortoqarsinnaanera upperiunnaarsimanngilaa, nunamilu maani aningaaseriviup alliartorsinnaanera upperaa.
- Appartitsinerit annertuseriarnerat sullitatta ataatsimut isigalugit akiliisinnaassusaannik ersersitsinngilaq, sullitavut ataatsimut isigalugit akiliisinnaassuseqarluarmata, pisortaq ilisimatitsivoq nangillunilu:
- Kalaallit Nunaanni niuernerput qiviassagutsigu uninngatitat taarsigassarsiallu siornamut naleqqiullugit qaffariarsimapput. Sullitanit nutaanit aamma ornigarneqarsimavugut, tamannalu soorunami naammagisimaarutigaarput, Kalaallit Nunaannilu suli siumukarsinnaanissarput naatsorsuutigalugu, Turið F. Arge oqarpoq.
GrønlandsBankenimut qallunaallu aningaaseriviinut allanut sanilliullugu amigartooruteqarneruneq tupaallannarpoq, aningaaseriviimmi nalinginnaasumik qaammatini pingasuni siullermi erniaqarluaramik sinneqartooruteqangaarsimapput.
Allamik taaguuteqalissasoq
Taaguummik unammisitsinissaq ukioq manna kingusinnerusukkut pissasoq aningaaseriviup siusinnerusukkut nalunaarutigaa.
Savalimmiuni immikkoortortaqarfiup marsimi Føroya Bankimut taaguutini allanngorteqqippaa (Savalimmiut aningaaserivia, aaqq.) taamalu 1906-imi taaguuteqaqqaarsimavoq. Soorlu Føroya Banki BankNordikimit Savalimmiunut attuumassuteqarnerusoq, taamatuttaaq Kalaallit Nunaanni immikkoortortaqarfik piukkunnarnerusumik tulluartumillu aningaaseriviup taaguuteqartilerusuppaa, oqaatigineqarpoq.
- Kalaallit Nunaanni immikkoortortaqarfipput tulluusimaarutigaarput – sullitanit nutaanit ornigarneqartuarpugut, aammalu pikkorissunik misilittagartuunillu sulisoqarluta, ilarpassuinik 2010-mi aningaaserivik ammarmalli tamaani sulisimasunik. Taaguut BankNordik ajunngikkaluarpoq, kisianni taaguummik tulluarnerusumik nassaassalluta kissaatigaarput, Kalaallit Nunaanni sullitatsinnut sulisutsinnullu pikkorissunut tulluunnerusumik. Taamaammat ukioq manna taaguutissarsiorluta unammisitsinissarput qilanaaraarput, taamanikkussamullu Kalaallit Nunaanniittut kikkulluunniit taaguutissatsinnik siunnersuuteqarlutik peqataasinnaassapput, Turið F. Arge, pisortaaneq, oqarpoq.
