Sumiginnagaaneq atornerluisullu ulluinnarsiutiginikuullugit naalakkersuisunngortoq

Oqaluttuaq tamakkerlugu tusarnaarusuppiuk? Mads Pedersenip oqaluttuarnera tamakkiisoq podcastimi ataatungaaniittumi tusarnaarsinnaavat.

Namminersorlutik Oqartussat allaffeqarfianniit Tuapannguit tungaanukarpugut. Tuapannguit tassaavoq Mads Pedersenip, ulluinnarni Maasimik ilisimanerusatta Nuummi eqqaamasaqaqqaarfia. Taamani Qaqortumi Tasersuup Atuarfiani 4. klassereerluni aasaanerani atuanngiffeqarnermini Nuummut anaanaminut tikeraarpoq.

- Anaanaga ukiut sisamat takunikuunagu tikeraarpara Nuummi najugaqartoq. Nuannerluni pilluarnarluni. Aappaqarluni blok R-imi najugalimmik, Maasi oqaluttuarpoq.

Aasarli naajartulersoq Qaqortumut angerlarpoq.

Podcasti tamakkiisoq ataani tusarnaarsinnaavat. Tassani Maasip peroriartornini, ikiaroornartumik imigassamillu atuisutut aniguiniarnini, naalakkersuisutullu suliniutigerusutani ilaatigut eqqartorpai.

- Qaqortumut uterama atugarliornermik. Ataataga tarnimigut nappaateqarami, taamani qanoq ikiorneqarsinnaanersoq naluneqarpoq. Inuuneq imaannaanngitsorujussuulluni. Taavalu imigassamik ikiaroornartumillu assut atuilluni.

Maasi nukkanilu ataataminni taamani najugaqarput. Angerlarsimaffimminnilu eqqissisimanngittoqaraangat susoqartarnera eqqaamalluarpaa.

- Ataataga politiinit aatikkaangat qimaannarneqartarpugut unnuami. Innaqqittarpugut. Ullaakkut itertarpugut inersimasoqanngitsoq nukagalu. Taava ilaquttatsinnukartarpugut, Maasip kingumut eqqaamasani taama oqaluttuarai.

Qaqortumili atugarliorneq qimallugu Nuummut anaanaminut uternissaminut periarfissarsivoq. Uternini nuannersuinnaasutut eqqaamavaa.

- Kammattaartupallappunga. Meerarpassuulluta aneertarpugut. Soorlu inuuneq pitsaaneroqqissinnaanngitsutupajaaq illuni. Kisianni taamani maqaasisaqaanga, angerlarsertaqaanga Qaqortumut. Qatanngutikka maqaasillugit, ataatagalu ernumagalugu.

Maasilli anaanaatalu Nuummi toqqissisimallutik inuunerat sivikitsuinnaavoq. Tuapannguani najukkaminnit anisariaqalerput angerlarsimaffeerullutillu. Oqaluttuaq taanna kingusinnerusukkut uterfigeqqissavarput.

“Sooruna politiit qimaannartaraatigut?”

Maasip Qaqortumi najugaqarnerata nalaani angerlarsimaffianni eqqissisimanngittoqaraangat politiit orniguttarput. Taama pisoqartillugu Maasi nukkanilu qimaannarneqakkajuttarlutik oqaluttuarpoq. Naallu taamani arfineq-pingasuinnarnik ukioqaraluarluni apeqqusersuisalereersimavoq.

- Eqqarsartuaannarnikuugama sooruna ikiorneqarneq ajortugut? Sooruna politiit qimaannartaraatigut? Arfineq-pingasunik sisamanillu ukiullit, Maasi eqqarsarpasilluni oqarpoq.

Kingorna misigisartakkani oqaasertalersortalerpai. Taatsi Kunullu peqatigalugit Prussicimik imminnut taallutik saqqummersitsipput. Meeqqat sumiginnagaasarnerat aamma ikiaroornartumik imigassamillu atornerluineq, oqaatsit sakkortuut atorlugit raperlutik saqqummersitsinerminni nunarput tamakkerlugu sajuppillatsippaat.

- Ilumuuillunga isumaqarnikuuvunga Prussic saqqummersikkatsigu (pissutsit aaqq.) aaqqissasut. Oqaasertaleratsigit tusaaneqassaagut. Aaqqissuunneqassapput, aaqqissapput. Ukiut 20-t matuma siorna. Suli pissutsit taamaapput.

Pissutsillu nikeriannginnerat Maasip taamani nakeriallaatigaa.

- Nikalloraluarnikuuvunga saqqummersitsinitsinnit ukiuni tulliuttuni allanngortoqanngimmat.

Naalakkersuisunngupiloortoq

Ukiut 20-t qaangiuttullu Maasi allanngueqataanissamut periarfissarseqqippoq. Tamatumuuna naalakkersuisutut akisussaasuulluni. Pissaanermik malitsilimmik akisussaaffeqalernissaminut periarfissaqaleriasaarnini ima oqaluttuaraa.

– Tassanngaannaqaaq, ullut marlupajaat nalunaarutigineqarnissannut aperineqarpunga. Nangaarianngiivillunga akuersivunga. Nangaariarnera kingulliuvoq, Maasi illarialaajutigaluni oqarpoq.

Maasi tamatuma nalaani KNR-imi HR-imi pisortaagallarpoq. Tusagassiortutullu ilinniagaqarami inatsisartunut qineqqusaarnerup nalaani oqallitsitsinerni ikiuuppoq, ilaatigut partiit siuttui oqallitsillugit. Partiit siulittaasuisa oqallitsinneqarneranni aqutsisuusinnarluni naalakkersuisunngoriasaarnera isornartorsiorneqarpoq. Naleraq ilaatigut isornartorsiueqataalluni. Atorfimminittaaq nikisitseriasaarnera Ekstra Bladetip allaaseraa.

- Takusinnaavara, kisianni ugguunartaatigut ippinnartinngilara HR-imi pisortaagallartutut tusagassiortut amigarnerujussuat peqqutaalluni ikiuunnikuuvunga. Piffissami tassani ilisimaavinngilara aperineqarumaarlunga naalakkersuisunngorusunnerlunga. Taamaammat oqallitsitsininni ilisimanngilara, aamma arlaannaalluunniit immikkut pinissaanik eqqarsanngilanga, Maasi oqarpoq.

Maasi Atorfillit Kattuffianni siunnersortitut siuliatigut atorfeqarnikuuvoq, KNR-imi tusagassiortuusimalluni. Aamma IA-p allaffeqarfiani siunnersortaanikuuvoq. IA-li sinnerlugu naalakkersuisunngoraluarluni partiimut pisortatigoortumik suli ilaasortanngunngilaq.

- Suliluunniit ilaasortanngunngilanga, kisianni partiip malittarisassaaniippoq inatsisartut, kommunalbestyrelset naalakkersuisut ilaasortaassasut. Taamaammat ilaasortanngorumaartussaassuunga.

Taava massakkut malittarisassat unioqqutilaarpatit?

- Kingumoortumik ilaasortanngortoqarsinnaasimassasoq naatsorsuutigaara.

Suliassarujussuaqarpoq

Maasip naalakkersuisutut suliassaa imaluunniit suliassai annertoorujussuupput. Sumiginnaaneq aamma imigassamik ikiaroornartumillu atornerluisut meerarpassuit suli ulluinnarsiutigaat. Atuuffigilikkamini sulinini aallarnerlugu tusarnaarlunilu paasisassarsiorusuppoq.

- Siullertut angalarusuppunga. Takorusuppakka nammineq isinnik. Kisianni oqariartuutigisaqattaarpara uanga naalakkersuisoqarfinni, isumaginninnermut aqutsisoqarfimmut. Systemi imminut qiviartariaqarpoq. Inuit systemimut tulluarsassanngillat, systemi inunnut tulluarsassaaq.

Meeraalluni sumiginnagaasimanini peroriartornerminilu atugarliorsimanini naalakkersuisutut sulinermini atorluarsinnaallugit qularinngilaa.

– Aqqusinermi piviusut nammineq misigivakka, Meeqqanut, Inuusuttunut Ilaqutariinnullu Naalakkersuisoq oqarpoq.

Nerriveeraq savimineq fjernsynilu videotalik

Maasip anaanaatalu Tuapannguani najukkaminnit anisariaqalernerat angerlarsimaffeerunnerallu uterfigeqqeriartigu. Angerlarsimaffeerukkamik utaqqiisaagallartumik inissinneqarnertik eqqaamavaa.

- Hotel Godthåb hoteliujunnaarnikuusoq, tassani ineeraqarpugut, naluara qanoq sivisutigisumik. Angerlarsimaffeqanngitsut tassani inissittarsimagunaramikkit, Maasi eqqaamasani pillugit oqaluttuarpoq.

Kingorna inini pisataqareersuni attartorlutik nooqattaarput. Ullulli ilaanni Paarnani initaariasaarput.

- Sunnguamillluunniit pigisaqanngilagut. Taamaallaat pigisatuara nerriveerara savimineq sisamanik assakaasulik, taavalu fjernsyneq videotalik.

Naak pigisaqanngikkaluarlutik initaarnertik nuannersuinnarmik eqqaamavaa.

- Pilluarluta initaaratta, Maasi oqarpoq.

Aalakoorluni biilerluni ajutoorpoq

Naak Maasi anaananilu initaaramik toqqissillutik inuusinnaaleraluarlutik, inuusuttuunera imigassartorfiullunilu ikiaroorfiusimaqaaq. Tamatumuuna ataataa pineqanngilaq, Maasimi nammineerluni ikiaroornartumik imigassamillu atuisunngorami. Piffissaq ingerlammat Maasi Nahomelu erneqqaatiminnik ukiut 18-it matuma siorna meerartaarput. Meerataaramik Maasip atuisuujunnaarnissamik takorloortakkani eqqarsaatimini puttallartillattaalerpaa.

- Oqartarnikuuvunga meerartaaruma unissuunga, taava meerartaarama unikkaluartarlunga, kisiannilu univissananga.

Ukiulli 13-it matuma siorna pisoq Maasip inuuneranut allannguinissamut uisitseqataavoq. Maasi aalakoorluni biilerluni ajutoorpoq, ajutoornermilu kingorna isertitsivimmi unnuisinneqarluni.

- Kanngusunnneq taanna misigigakku, kanngusorujussuarama aamma erninnut. Ernera sisamanik ukioqartoq. Kanngunartorujussuuvoq ataataalluni. Nalunngilara ernerma asanerpaasai tassaasut anaana ataatalu.

Tamatumali nalaani pisoq alla Maasip allannguerusulerneranut sapiissuseqalersitsisoq pivoq. Maasi erninilu tasiorlutik angerlarujoorlutik ernera oqariasaarpoq.

- Paatsuugassaanngiivissumik oqarami: “Ataata isumaqarpunga illit allamut nuukkuit pitsaanerusoq.” Sooruna? “Aalakooraangavit anaana aliasutsittarakku.” Taava anaaterujussuarlunga. Meeraq taama ilumoortigisumik oqarsinnaasoq. Arlaqarput mikisualuit katsorsarnissannut sapiillisitsisut.

Angajoqqaani attaveqatigillualernikuugai

Maasi ullumikkut 40-nik ukioqarpoq atuisuujunnaarnikuullunilu. Nahomelu katisimapput pingasunillu erneqarlutik. Meeraarnermini peroriartornerminilu qanoq ittuusimanini eqqarsaatersuutigisinnaalernikuuaa. Angajoqqaaminillu isiginninnera allanngorsimavoq.

-Inuusuttuaraallunga inersimasunngorninnilu kamassaqarfiginikooqaakka, aamma utertitsiffiginikooqaakka.

Angajoqqaanilu attaveqarfigillualersimavai.

- Ullumikkut isumakkeerfiginikuuakka, pisuutinngilakka. Nalunnginnakku sapinngisartik tamaartut, uannut taanna isumaqarnerpaavoq. Anaanaq ataatarlu meerartik pitsaanerpaamik atugaqartikkusukkaat. Pitsaanerpaanikuunngilaq aap. Kisianni tamaviaarput, uannut taanna naammappoq, Maasi taama oqarpoq.