“Suna utaqqivarput, ilisimaareerparput qanoq iliussanerluta”

Olennguaq Kristensenip kuffertini Savissivimmit eqqaanillu assinik immersimavaa, taakkulu silap pissusia pillugu ataatsimeersuarnermi “The last ice of the Arctic: Greenland’s melting ice and the global crisis”-imi aalajangiisartut akuliutsinnissaannik ukkataqarluni namminersortunit aningaasalersorneqartumik ataatsimeersuarnermut peqataasunut takutinneqarput.

- Misigisaq nutaajuvoq, siullermeerlungami Kalaallit Nunaat qimallugu angalavunga. Pissanganaqaaq, Olennguaq Kristensen, angalanermini piviusulersaarusiap "The color of ice"-p pingasoriarluni takutinneqarnerani peqataasimasoq, Københavnimiit Dubai aqqusaarlugu Qaanaamut uteqqinnermini Ilulissanut aqqusaartoq, oqarpoq.

Ulluinnarni silap pissusiata allanngoriartornera

Piviusulersaarummi professor William Colgan GEUS-imeersoq inuttaaqatigaa. Filmi takutinneqareermat Olennguaq Kristensenip Savissivimmiit assinik takutitsinera piffissaqarfigineqarpoq, aammalu silap pissusiata allanngoriartornerata ulluinnarni piniartutut inuuneranut qanoq sunniuteqarnera pillugu apeqquteqarnissamut piffissaqartoqarpoq.

- Sikusarnera qaammatinik pingasunik kingusinerusukkut pisalertoq oqaluttuaraara, aamma Taiwanimut aallarnerma kinguninngua Qaanaap eqqaani siku qupititilersimasoq, Savissivimmullu qimussimik utersinnaanersugut nalornissutigalugu oqaluttuaraara, Olennguaq Kristensen oqarpoq, taannalu Taiwanimut aallarami Savissivimmiit Qaanaamut qimusserluni sapaatip akunnerata missaani angalareerluni Nuummut timmisartumut ikivoq.

Piujuartitsilluni tunisassiorneq

- Ataatsimeersuarnermi peqataasut silaannaap allanngoriartornerata piviusuuneranik paasinnipput, piniartuuninnullu ulluinnarni qanoq sunniuteqartarnersoq paaserusuppaat, uangalu kinguneri piviusulersaarummi takutinneqartut oqaluttuaraakka, Olennguaq Kristensen oqarpoq, taassumalu aamma peqataasut naapikkusukkaanni kingornalu siullermeerlutik Kalaallit Nunaanni piniartumik naapitsigamik assiliseqatigiumasimagaanni misigisimavaa.

Piujuartitsisumik pinngortitamillu mingutsitsinngitsumik qanoq tunisassiortoqarsinnaanersoq oqallisigineqangaatsiartoq Olennguaq Kristensenip maluginiarpaa.

- Assersuutigalugu creminik, quligutinik tarngutinillu tunisassiortoq, pinngortitamik mingutsitsinatik arrorsinnaasunik atoqqissinnaasunik puulinnik atuillunilu tunisassiornermini seqernup nukinganik atuivoq, Olennguaq Kristensen oqarpoq.

Silap pissusia pillugu ataatsimeersuarfiup silataani silap pissusiata allanngoriartorneranut iliuuseqarnissamut kajumissaarisumik allagartaqarpoq.

- Allagartaq tamatta iliuuseqarnissatsinnik kajumissaarivoq, ""Sussanerluta nalunagu suna utaqqivarput?", Olennguaq Kristensen oqarpoq.