Danmarkimi illersornissaqarfik timmisartut nakkutiginninnermi atorneqartut Challengerit taartissaannik Sverigemi pisinissamik eqqarsaatersuuteqarpasippoq.
Timmisartummi Saab Global Eyet sisamat Danmarkimut tuninissaannut missingersuummik, Sverigemi naalakkersuisut inatsisartunut aamma Riksdagimik taagorneqartunut, saqqummiussaqarput.
Danmarkimi illersornissaqarfik timmisartut nakkutiginninnermi atorneqartut Challengerit taartissaannik Sverigemi pisinissamik eqqarsaatersuuteqarpasippoq.
Timmisartummi Saab Global Eyet sisamat Danmarkimut tuninissaannut missingersuummik, Sverigemi naalakkersuisut inatsisartunut aamma Riksdagimik taagorneqartunut, saqqummiussaqarput.
Danmarkip timmisartut taakkua sisamat pisiarissagunigit Kalaallit Nunaanni silaannakkut nakkutilliineq pitsaanerulersissavaa, amerikamiullu Danmarkip Kalaallit Nunaannik nakkutiginninneranik isornartorsiuisut qularunnaarsissinnaallugit. Amerikami præsidentip tullersortaata J.D. Vancep Pituffimmut marsip 28-ani tikeraarnermini Danmark Kalaallit Nunaannik illersuinera amigarnerarlugu sakkortuumik isornartorsiorpaa.
Svenskit Canadamiullu suliniutaat
Nakkutilliissut Global Eye Sverigemi Saabip Canadamilu Bombardierip suleqatigiinnerisigut ineriartortinneqarpoq, timmisartumullu Bombardier Global 6000-imut ikkunneqassalluni. Timmisartoq pineqartoq tassaavoq CRJ, taanna Bombardierip ilaasunik akunnattumik ungasissusilinnut angallassinermut atugassatut suliaraa, SAS-illu Danmarkimi nunap iluani timmisartuussinernut atugaralugu. SAS-ip atugaa CRJ 900 90-inik ilaasoqarsinnaavoq. CRJ aamma tassaavoq Challengerit aallaavigalugit ineriartortinneqarsimasoq.
Timmisartoq Saabip nakkutilliissutitut atorneqarsinnaanngorlugu naleqqussarlugulu suliaraa. Nakkutilliinermut radari nutaaliaasoq Erieye Extended Range timmisartumut ikkunneqartarpoq. Radarillu taassuma timmisartut atsissumi timmisut 450 kilometerit iluaniittut takusinnaavai, timmisartullu allat nalinginnaasumik 650 kilometerisut ungasitsigisumiittut takusinnaallugit.
Timmisartoq nalunaaquttap akunnerini aqqanilinni timmisinnaavoq issittumilu, aamma ingammik, annaassiniarnerni atussallugu piukkunnartuulluni. Issittumi Sakkutooqarfiup ikiorneqarnissamik pisariaqartitsisut Challengerit atorlugit sumiiffissiniartarpai, sumiiffissereeraangagillu ajutoorfiusumiittut qulimiguulimmik umiarsuarmilluunniit tikinneqarsinnaasarput. Taama aamma pisoqarpoq tyskit timmisartuat Narsarsuup avataatungaani imaannarmut mittariaqalernerata kingorna.
Svenskit nakkutilliissutitut ineriartortitaat nutaajuvoq, saudiarabiamilu sakkutuut timmisartuini atorneqarluni. Saudiarabiamiummi timmisartunik tallimanik 2020-miit 2024-mut kittaarlugit tunniunneqartunik pisinikuupput. Sverigemiut timmisartunik pingasunik 2027-mi piareertussanik aamma pisinikuupput. Timmisartut taakkua qanoq akeqarneri ilisimaneqanngilaq, Ritzauilli allaaserisaa naapertorlugu Sverige timmisartumut ataatsimut 1,75 mia. koruunit 2,5 mia. koruunillu akornanni akiliisimavoq.
Suli aalajangertoqanngilaq
Sverigemiut timmisartuinik pisisoqassanersoq Illersornissamut ministereqarfimmit suli uppernarsarneqanngilaq. Periarfissalli misissorneqaleruttortut illersornissamut ministerip Troels Lund Poulsenip (V) DR-imut allakkatigut akissutaani atuarneqarsinnaavoq.
- Timmisartunik nakkutilliissutinik pisisoqassanersoq suli aalajangertoqanngilaq, Illersornissaqarfilli nukittorsaqqissagutsigu periarfissanut arlariiusunut taakkua ilaapput.
- Taamaammat svenskit nakkutilliissutitut timmisartuutaat periarfissanut pingaarutilinnut ilaapput, illersornissamut ministeri taama allappoq.
Timmisartut Challengerit sisamat 1998-imeersut nutaanngililerput. Taamaammat Illersornissaqarfiup anguniakkani, tassa Kangerlussuarmi ataatsimik timmisartoqartuaannarnissaa angujuminaatsittarpaa. Tamanna folketingimut ilaasortap Aaja Chemnitzip (IA) uparuarnikuaa, Danmark Kalaallit Nunaannik illersuinissamisut pisussaaffimminik naammassinninnginnerarlugu.
