Dronningip qiperugaq kingulleq uleerpaa — Dodekalitten ukiut 20-t qaangiummata naammassineqarpoq

Dronning Maryp eqqumiitsuliami „Dodekalitten“-imi ujaqqanik qiperukkat aqqaneq-marluusut, ilaat kingulleq marlunngornermi uleerpaa.

Ujaqqat granitiusut taakku 7-9 meterisut portutigalutillu Ravnsby Bakkerimi Lollandimiittumi nigaliusatut inissisimapput. Ujaqqat aqqaneq-aappaat minnerpaasorlu eqqumiitsuliamik naammassinnittuusoq ukiut 20-t utaqqineqarsimavoq.

Qiperugaq, Ymririmik taaneqartoq, uleerneqannginnermini kalaallit erfalasuannik angisoorsuarmik ulinneqarsimavoq.

Qiperuisartoq Thomas Kadziola qiperukkamik sanasuuvoq.

TV2 Øst naapertorlugu qiperuisup uleersinermi oqalugiarnermini Kalaallit Nunaat „ujaqqamik eqqumiitsuliamut tunissutaasumik“ tunissuteqarmat qujaffigaa, tassami qiperugaq granitimik nunatsinneersumik qiperugaavoq.

Ujaqqat aqqaneq-marluk qulaaniittut inuit niaquitut qiperorneqarsimapput. Kiinaat nigaliusap 40 meterisut silissusillip qeqqanut sammipput.

Ujaqqat qiperukkat ullukkut qaamanerani alakkaraanni, nigaliusami issiavimmiit nipilersuutit elektroniskiusut tusarneqarsinnaapput.

Nipilersuutit nalinginnaasut Rasmus Lyberthip kalaallisut erinarsugaanik najuuttullu ataatsimoorlutik erinarsoqatigiinnerannik marlunngornermi taarserneqarsimapput.

Alapernaatsorpassuit dronningi ilassiniarlugu uleersinerlu najuuffiginiarlugu „Dodekalittenimut“ takkupput.

Dronning Mary aamma nuannaartoq uleersinerup kingorna takuneqarsinnaavoq.

- Eqqumiitsuliaq tupinnangaarlunilu misigissutsinik ulikkaarpoq, inuppassuillu nuannaarutigissavaat, dronningi TV 2-mut oqarpoq.

Dronningittaaq saqqarmiumik ujaqqap Kalaallit Nunaanneersup, qiperukkami kingullermi atorneqartup ilamernganik sanaamik, tunineqarpoq. Saqqarmioq aamma kuultimik qaqortumik aappaluttumillu 14 karatiusumik kusassaaserneqarsimavoq, TV2 Øst taama allapppoq.

"Dodekalitten" kunngikkormiunit aatsaat takuniarneqalinngilaq. Dronning Margrethep qiperukkat pingajussaat ukiut qulit matuma siorna uleerpaa.

Tassani Margrethep allunaasaq ulimaammik ataasiaannarluni anaareerlugu ujaqqap uleruaa nunamut nakkartippaa.

2016-imi juunimi takuniaaneq kunngip umiarsuaata Dannebrogip aasaanerani angalaneranut ilaavoq.

/ritzau/