GUX Nuuk rektoritaarpoq

Nuummi GUX aggustip aallaqqaataanit nutaamik rektoreqalissaaq, tassa Arnannguaq Christiansen. Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik, taamatut tusagassiutitigut nalunaaruteqarpoq.

Arnannguaq Christiansen GUX-meersuuvoq, tassanilu ukiuni kingullerni ilaatigut perorsaasutut ilinnialernissamut piukkunnarsartunut akisussaasuusimalluni, Naalakkersuisoqarfik allappoq

Aamma ilinniartitsisutut siunnersortitullu atorfeqarsimavoq, sulianut ataatsimiititaliami ilaasortaasimalluni tamatumalu saniatigut ilinniartitsineq, kulturimik paasinninneq allannguiniarnerillu pillugit masterinngorniarluni ilinniaqqittariaqarsimagami.

Naalakkersuisoqarfimmit rektori nutaaq nersualaarneqarpoq ilaatigut inuusuttut ilinniarnertuunngorniarfinni oqaatsit kulturillu tungaatigut unamminiagassaannik ilisimasaqarluarnera pillugu:

"Arnannguaq Christiansen soqutiginninnerujussuani aamma tunniusimanerujussuani pillugit ilisimaneqarpoq, taakku saniatigut ilinniarnertuunngorniarnerup silarsuaanni misilittagaqarpoq amerlasuunik atorluarneqarsinnaasunik aamma ilinniarnertuunngorniarfinni unammillernartorpassuit ilisimaarilluarpai minnerunngitsumik kulturikkut oqaatsillu aallaavigalugit unammillernartut inuusuttut ullut tamaasa nalaattagaat.

Naalakkersuisoqarfiup Arnannguaq Christiansenimik toqqaanermigut piginnaasat nukittuffiillu taakku amerlasuut GUX Nuummiittumi patajaassutsimik ukiunilu aggersuni nutaamik eqqarsarnermik qulakkeerinninnissaq Naalakkersuisoqarfiup qularinngilaa, taamaattumillu Naalakkersuisoqarfiup rektori nutaaq suleqatigissallugu qilanaaraa."