Aningaasaqarnermik ilisimasalik Naalakkersuisut aaqqissuusseqqinnermut isumalioqatigiisitaliaanni siuttuussaaq

Isumalioqatigiissitap nutaap pisortat ingerlatsiviisa pisariillisarnissaannut innuttaasunullu qaninnersumik aaqqissuusseqqinnissamut inassuteqaatit suliarissavaat.

Aningaasaqarnermut Naalakkersuisoq Aqqaluaq B. Egede (IA) tusagassiutitigut nalunaarummi allappoq:

– Nunatsinni ukiuni aggersuni aningaasaqarnikkut annertuumik unammilligassaqartoq nalunngilarput. Ineriartorneq taamaaginnartillugu pissappat pisortat aningaasartuutaat isertitanit sukkanerusumik annertusiartussasut, siuartitsinerit tamarmik takutippaat, Aqqaluaq B. Egede oqarpoq nangillunilu:

- Taamaammat Aaqqissuusseqqinnissamut ataatsimiititaliaq pilersipparput. Aalajangernissamut tunngavissamik patajaatsumik pilersitsinissaq anguniagaavoq, taamaalilluta piffissaq eqqorlugu iliuuseqarsinnaaqqulluta, kinguaariinnullu tullernut inuiaqatigiinnik atugarissaartunik nukittuunik piujuartitsisunillu qulakkeerinnissinnaaqqulluta.

Naalakkersuisut isumalioqatigiissitami siulittaasussatut Johnny í Grótinimik, Københavnip Universitetiani aningaasaqarnermut tunngasunik ilinniagalik Savalimmiunilu ukiorpassuarni nuimasunik atorfeqartarsimasoq, toqqarpaat.

Johnny í Grótinumi Savalimmiuni Tórshavnimi najugalik Savalimmiuni ilisimatusarfimmi aningaasaqarnermut tunngasunik bacheloritut ilinniagaqarnermut pisortaavoq Savalimmiunilu Aningaasaqarnikkut Siunnersuisoqatigiinni siulittaasuulluni.

Siulittaasup tullia nunatsinni pisortaq

Isumasioqatigiissitap siunnersuusiornissaq aaqqissuusseqqinnernullu tunngatillugu siunnersuutinik tigussaasunik, Kalaallit Nunaanni atugarissaarnermut aaqqissuussaanerup siunissaanut qulakkeerutaasinnaasunik suliaqassaaq:

- Septembarimi isumalioqatigiissitaq pisortat suliffeqarfiinut assigiinngitsunut pulaarniarluni pilersaaruteqarpoq taakkunani qaangerniagassat pillugit, pisortani ingerlatsivinni suliat akimorlugit aaqqiissutissanik nutaanik aaqqissuusseqqinnernillu pisariaqartitsiffiusuni, qanimut paasisaqarniarluni, Johnny í Grótinimi oqarpoq.

Aaqqissuusseqqinnermut isumalioqatigiisitap ataatsimiinnerani siullermi Anne Nivika Grødem, Bankivimmi Kalaallit Nunaanni pisortaq, siulittaasup tulliatut qinerneqarpoq.

Naatsorsuutigineqarpoq isumalioqatigiisitap nalunaarusiaa siulleq aappaagu kvartalimi siullermi tunniunneqassasoq, inaarutaasullu 2028-p affaani siullermi tunniunneqarnissaa naatsorsuutigineqarpoq.

Ataatsimiititaliami ilaasortat allat tassaapput:

• Nivi Strunz, namminersortoq, Kalaallit Nunaat

• Hilde Singsaas, Norgemi Avatangiisinut Pisortaqarfimmi pisortaaneq

• Maliina Junge Jørgensen, Kommuneqarfik Sermersuumi immikkoortortaqarfimmi pisortaq

• Magni Laksafoss, Savalimmiuni Sjókovinimi inuiaqatigiit aningaasaqarnerat pillugu ilisimatusartoq

• Ellen Lerch Høj, Grønlandsbankenimi niuernermik ineriartortitsinermut pisortaq

• Hans Jørgen Mørch, namminersortoq, Kalaallit Nunaat

• Line Mika Skov, Tusassimi Kalaallit Nunaanni aningaasaqarnermut pisortaasoq

• Jørgen Aqe Møller, Kalaallit Nunaanni RAL-imi aningaasaqarnermut pisortaaneq