Kujallermi aningaasaqarnermik aqutsinermi suli ajornartorsiortoqangaatsiartoq - arlaannaannulluunniit attuumassuteqanngitsumik misissuisoqassasoq

Kommune Kujallermi aningaasaqarnerup aaqqissuunnissaa suli ulapputigineqarpoq, sulilu naammassineqaqqajanngilaq.

Kommunalbestyrelsi sapaatip-akunnerani kingullermi ataatsimiimmat politikerit kommunimi atorfilittat qullersaannit Randi Vestergaard Evaldsenimit ernumanartumik nalunaarfigineqarput.

Tassami „aningaasaqarneq tamarmiusoq pillugu paasissutissanik tutsuuinartunik aningaasatigut tunngavinnik takutitsisinnaasunik soqanngitsoq“ kommunimi atorfilittat qullersaat isumaqarpoq.

Randi Vestergaard Evaldsen tamanna pissutigalugu kommunalbestyrelsip allaffissornerullu siunissami aningaasaqarnermut tunngasunik paasissutissanik tutsuiginartunik pissarsisinnaanissaasa qulakkeerneqarnissaa siunertaralugu arlalitsigut iliuuseqartoqarsimasoq politikkerinut nalunaarummini nangilluni allappoq.

Aqutsineq pillugu arlaannaannulluunniit attuumassuteqanngitsumik misissuineq

Aningaasaqarnermut Inuussutissarsiornermullu Ataatsimiititaliap kommunimi aningaasaqarnikkut pissutsit arlaannaannulluunniit attuumassuteqanngitsumit misissorneqassasut akuerigaa nalunaarusiami takuneqarsinnaavoq:

„Massakkorpiaq ingerlatsinermik misissueqqissaarsinnaasunik kiisalu kommunip aningaasaqarneranik inaarutaasumik kukkunersiuisinnaasunik attuumassuteqanngitsunik sulisussarsiuleruttorpugut, tamatumanilu aaqqiissut kommunimut akikinnerpaaq pissarsiaqataanerpaarlu nassaariniarniarparput,“ Randi Vestergaard Evaldsen allappoq.

Aningaasanut nalunaarusiamiit suliniutit kissaatigisatut aappaagu naatsorsuutini kinguneqarumaartut kommunimi atorfilittat qullersaata naatsorsuutigaa.

Randi Vestergaard Evaldsen naapertorlugu allaffissornikkut ingerlatsivinni missingersuutinik malinnaasarneq pitsanngorsarneqarmat siuariartoqarpoq.

2025-mi naatsorsuutit piffissaq eqqorlugu naammassinissaat neriuutigigaa

Aammattaaq allaffeqarfiit kommunip 2025-mut naatsorsuutaanik suliaqarput, kommunilu piffissami tamatumani immikkut akuersissummik qinnuteqannginniassammat naatsorsuutit piffissaq killiliussaasoq qaangiutsinnagu naammassineqarlutillu tunniunneqarsinnaassasut neriuutigineqarpoq.

Kommunip kukkunersiuisuisa 2024-mut naatsorsuutit suliarineqarnerannut atatillugu kommunip aningaasaqarnera 2021-mi it-systemip nutaap atulersinneqarneraniilli ajornartorsiuteqalersoq isornartorsiungaatsiarpaat.