Taamaatitsiinnarnerpassuit Air Greenlandimut amigartoorutaasut

Timmisartuussinissat taamaatiinnarneqartut aatsaat taama amerlatiginerat Namminersorlutik Oqartussat timmisartuutileqatigiiffiutaannut Air Greenlandimut aningaasatigut annertuumik kinguneqarpoq.

Ingerlatseqatigiiffiup ukiup affaanut nalunaarusiani saqqummiuteqqammerpaa, 2025-mimilu ukiup affaani siullermi 87,4 millionit koruuninik amigartooruteqartoqarsimasoq takuneqarsinnaavoq.

Piffissami tamatumani taamaatitsiinnarnerit akisoqisut pingasunik pissuteqartut ingerlatseqatigiiffiup tikkuarpai:

• Oqaluttuarisaaneq ataatsimut isigalugu aatsaat taama

• Mittarfinni atortut, taakkununngalu mittarfiit quasattut, isumannaallisaanermi misissuisarnermut atatillugu kinguaattoornerit, nassatanik tunniussisarfiit aammalu Nuup Mittarfiani ikummatissanik assartuussinermi utaqqisarnerit ilaatinneqarput

• Kingoraartissanik tikittussanik sivisuumik utaqqisarnerit
  

59-it taamaatiinnarput, ukiup siuliani taamaatitsinerit pingasuupput

Kangerlussuaq Kalaallit Nunaanni angallannermut qitiusutut inissisimajunnaarluni Nuup mittarfianit taarserneqarnerani pillugu ima allassimasoqarpoq:

- Pissutsit matuma siuliani taaneqartut kingunerannik Jet atorlugu timmisartuussinerit 59-it taamaatinneqarput, siorna taamaalerneranut, Kangerlussuup angallannikkut eqiteriffittut atorneqarallarneranut pingasuusunut naleqqiullugu, Air Greenland tusagassiorfinnut nalunaarummi allappoq.

Ukiup affaani siullermi ineriartorneq tunngavigalugu ukiumi angusassanut naatsorsuutigineqartut appartinneqarput, aammalu avataaniit pissutsit inernerusussanut sunniuteqaqqinngippata 2025 tamakkerlugu akileraannginnermi 30 millionit koruuninik amigartooruteqarnissaq naatsorsuutigineqartoq, ingerlatseqatigiiffik allappoq.

Pisortaaneq: Sunnersimaneqarpugut

Ukiorpassuit angallasseriaatsit ataasiinnaat atugarineqareerlugit pissutsinut nutaanut naleqqussartussanngortoqartoq Jacob Nitter Sørensen oqarpoq:

- Unammilligassanit, Air Greenlandip toqqaannartumik sunniuteqarfigisinnaasaasa avataaniittunit sunnersimaneqarpugut, kisiannili aamma naammassinnittussanut ilaavugut. Taamaattumik akisussaaffipput tigullugu iliuuseqarfigisinnaasatsinni suliniutinut, ingerlatsinermik patajaallisaataasussanut suleqataavugut.

- Timmisartuussinerit pilersaarutit malillugit naammassineqarnissaat pitsannguiniarpugut, tamatumalu peqatigisaanik aaqqiissutissanik atuutsinneqalersussanik ingerlatsiinnarnissarput aallutissavarput, aammalu suleriaatsinik, atuisut atuisutut misigisassaannik, pingaartumillu ingerlatsinermi akornusersuutinik pisoqartillugu, pitsaanerulersitsissalluta. Akornusersuutit taamaattut pinngitsoorsinnaanngilagut, sila uagut sunniuteqarfigisinnaanngisarput tunngavissanut ilaammat, Jacob Nitter Sørensen oqarpoq, nangipporlu:

- Periarfissaq manna iluatsillugu sulisugut suliaqarnerannut qutsavigaakka. Pisinnaasatik tamaat sulipput, aammalu atugassarititaasut atoruminaakkaluartut naammassinninniarlutik annertunerusumik suliaqartarput, oqarpoq.