Taamaattumik mittarfiup illorsua ussiippoq
Nuummi mittarfiup illorsuartaava ussiippoq, tamannali nassuiaatissaqarpoq.
Nuummi mittarfiup illorsuartaava ussiikkunnaarniassammat sanasut suliaqaleruttorput.
Assiliisoq: Greenland Airports
Sila siallertillugu mittarfiup illorsuata ussiinnerani ilaasut illup iluani qattanik imermik kuserfiusunik naammattuuisinnaapput.
Sooq illu nutaaq ussiinnersoq Greenland Airportsimi attaveqaqatigiinnermut pisortaq Mikkel Bjarne Lund nassuiaavoq:
- Ukioq manna siusinnerusukkut illu misissorneqarpoq, tassanilu sananeqaataasa ilaat allanngortinneqartussaasut paasineqarpoq, soorlu igalaat illullu saqqaani ataatigut iikkiussat akornanni allanngortitassat, aamma qinnilinnut kikiagusersuutit ussiittut paasineqarmata taarserneqartuussat.
Illorsuup saqqai amigarput
Ilaatigut tamanna pissutigalugu illorsuup saqqai amigartut, taamaattumillu mittarfiup illorsuani sumiiffinni ataasiakkaani imermik kusertoqartoq, attaveqaqatigiinnermut pisortaq nassuiaavoq.
- Ussissaasoqaleruttorpoq, aammali illup ilaa erngup innarligaa taarsersorneqaleruttorluni. Qaammatit tulliuttut ingerlanerini illorsuup naammassineqarnissaa ussissunnguissimanissaalu naatsorsuutigaarput, Mikkel Bjarnø Lund ilisimatitsivoq.
Mittarfiup illorsuaa suli naammassineqanngerujussuarpoq. Illorsuup saqqaata suliarinerisa saniatigut init quleriit aappaanni allaffeqarfiusussami isersimaartarfeqartussamilu sanasut suliaqarput.
Novemberip 28-ani mittarfiup ammaanersiorneqarnissaa sioqqullugu illumi nutaami ajoquteerarpassuit iluarsineqareersimanissaat Greenland Airportsip naatsorsuutigaa.
