Takornariaqarnermut inatsit nutaaq: Takornariartitsisut akuersissummik peqartariaqalerput

Isumannaatsuunissaq, peqqissuunissaq, avatangiisit piujuartitsinerlu eqqarsaatigalugit nunami maani takornariaqarnermik ineriartortitsineq ingerlanneqartariaqarpoq.

-  Takornariartitsinermi ingerlatsinermut killiliussanik aalajangersaanikkut ineriartornerup tamatuma pissusissamisoornerpaamik siuarsarneqarsinnaanera ineriartortinneqarsinnaaneralu nalilerneqarpoq, oqaaseqaatini allassimavoq, tassuunakkullu "suliassaqarfinni tamani nunatsinni innuttaasut salliutinneqarnissaata qularnaarneqarnissaa" anguniagaavoq.

Tunniussineq

Piffissami killiligaanngitsumi piffissamiluunniit killiligaasumi akuersissut tunniunneqarsinnaasoq, taamaallaallu Kalaallit Nunaanni sumiiffinni aalajangersimasuni atuussinnaasoq, Naalakkersuisut isummerput.

- Pisinnaatitsissummik pigisaqartut nunatsinnut attaveqartuuneranik tamakkiisumillu Kalaallit Nunaanni akileraartartuunissaannik, takornariartitsinermillu ingerlatsinerminnut atatillugu sillimaniarnissamut pilersaarusiorsimanissaannik sillimmasiisarnissaannillu piumasaqaateqartoqarnissaa siunnersuutigineqarpoq. Piujuaannartitsisumik ingerlatsisoqarnissaanik aamma piumasaqaateqartoqarnissaa siunnersuutigineqarpoq, oqaaseqaatini allassimavoq.

Inatsisit naapertorlugit assartuutinik motorilinnik takornarianik Kalaallit Nunaannut tassanngaaniillu inuit angallassisartut akuersissuteqartarnermik piumasaqaataasussat avataaniittariaqartut nalilerneqartoq, oqaaseqaatini allassimavoq.

- Angallassissutit nunakkut motorillit takusassarsiortitsisarnernut atorneqartassappata, kiffartuussinernulluunniit allanut takornariartitsinernut ilaasunut atorneqassappata Inatsisartut inatsisaata matuma iluaniittunut, akuersissuteqartoqartarnissaa piumasaqaataasariaqassasoq, erseqqissarneqarpoq.

Nakkutilliineq

Akuersissutinut piumasaqaatinik malinninnermik qulakkeerinnittussamik, akuersissutinik tunniussisarneq nakkutilliinermik malitseqartarpoq.

- Eqqartuussivinniit akuersissutitaqanngitsuni Inatsisartut inatsisaannik tunngaveqartunik suliat ingerlatsinerillu nakkutilliinermut atatillugu tamaasa orninneqarsinnaaneri periarfissaasariaqartoq naliliisoqarpoq, tamanna nakkutilliinermut atatillugu pisariaqartinneqarpat, ilisimatitsissutaavoq.

Takornariartitsinermi ingerlanneqartussatut qinnuteqartup neqeroorutiginiakkaminut sillimaniarnermut atatillugu pilersaarutinik suliaqarnissaa ilisimatitsissutaavoq, "nalorninaatinik nalilersuinerit ilaassallutik, immikkut ingerlanniakkanut aalajangersimasunut atatillugu sillimaniarnikkut naliliinernik imaqassalluni, ulapungaarsimalluni iliuusissanut pilersaarusiaq ilaassalluni, ulorianarluinnartunik pisoqassagaluarpat imaluunniit ajutoortoqassagaluarpat iliuusissanik pilersinneqartussanik allaaserisanik imaqassalluni". 

Siunnersuut naapertorlugu immikkut ittutigut siulianiittuni piumasaqaatini sanioqqutsisoqarsinnaaneranik periarfissaqartinneqassapput. Assersuutigalugu takornariartitsinermik ingerlatsisumi immikkut isiginiagassaqartillugu imaluunniit inuiaqatigiinnut atatillugu immikkut isiginiagassaqartillugu tamanna atuussinnaavoq.

Qinnuteqartoq sillimmasiissuteqareersimappat allatigulluunniit qularnaveeqqusereersimappat aatsaat akuersissummik tunineqarsinnaasoq, aammattaaq piumasaqaataavoq.

Zonenut agguataarinerit

Takornariaqarnermut inatsimmi nutaami immikkut iliuuseq alla tassaavoq inuussutissarsiortunut zonenut agguataarineq, zonellu taakkua iluanni inuit ingerlasinnaanissaat pineqarpoq.

-Pinngortitaq avatangiiserput, uumasut sumiiffimmiittut imaluunniit allatigut inuussutissarsiutinik ingerlatsineq, soorlu piniarneq piniartullu illersorumallugit mianeriumallugillu zone-ni aalajangersimasuni (paasillugu sumiiffinni aalajangersimasuni) imaluunniit piffissani aalajangersimasuni inuussutissarsiutinik tunngavilimmik ingerlatsisoqartarnissaanik aalajangersaasoqarnissaa pissusissamisuussaaq. Pissutsit eqqaaneqareersut tunngavigalugittaaq matumanilu aamma killiliisoqartarnissaa angalaartunik uninngaartunillu, sumiiffinnut aalajangersimasunut atasumik aqutsisoqarnissaa pissusissamisuussaaq, oqaaseqaatini allassimavoq.

Atugassarititaasussanik pineqartutut ittunik aalajangersaasarnerit kommuniniippata pissusissamisoornerussasoq Naalakkersuisut naliliipput, nalilersuisarnissanut kommunimi suliassaqarfiit suut immikkut killilersuiviusariaqarnersut kommunit nalinginnaasumik piukkunnarnerummata.

Sumiiffiit assigiinngitsut pingasut

Sumiiffinni assigiinngitsuni, niuertunut takornarianullu assigiinngitsunik atugassaqartitsisuni, takornarialerisoqarsinnaassasoq siunnersuutigineqarpoq.

- Assersuutigalugu inuussutissarsiornikkut ingerlatsinerni imaluunniit angalaartarnerni tammaarsimaartarnerniluunniit zonenut assigiinngitsunut agguataarinerit pineqarsinnaapput. Assersuutigalugu zone qorsuusoq killilersuiviunngitsoq, zone sungaartoq immikkut piumasaqaateqarfiusoq atugassaqarfiusorlu, kiisalu zone aappalaartoq inuussutissarsiutinik ingerlatsisinnaanermut aamma / imaluunniit angalaarsinnaanermut uninngaarsinnaanermullu tamakkiisumik inerteqquteqarfiusoq pineqarsinnaapput, siunnersuutaavoq.

Pisortanut aningaasaqarnikkut pitsaasumik siunnersuut kinguneqartussaasoq, Naalakkersuisut naliliipput. Suliffissat annertusinerisigut aamma aningaasatigut kaaviiaartitat amerlinerisigut tamanna pissasoq naatsorsuutigineqarpoq, "qinnuteqaatinilli suliaqarnermut, akuersissutinik nalunaaruteqartarnernut kiisalu nakkutilliinermi sulianut pisussaaffiusunut" sulisut nukiinik siunnersuut pisariaqartitsissasoq oqaatigineqarpoq.

Kingunerisassat pitsaanngitsut

Suliffeqarfinnut aningaasaqarnikkut kingunerisassat arlaqartut ilisimatitsissutaavoq, soorlu uku:

1. Akuersissut pillugu sulisussanik amerlanerusunik atorfinitsitsisoqartariaqarsinnaavoq, atortussanik nutaanik takornariartitsisarnermut atatillugu pisiniartoqartariaqartoqarsinnaalluni assigisaanilluunniit.

2. Allaffissornikkut pitsaanngitsunik sunniuteqarsinnaavoq, akuersissummi atugassarititaasunik naammassinninniartarneq, tamatumani aamma siunnersuummi aalajangersakkat nalunaarusiortarnissanut tunngasut naammassiniartarnissaat il.il., kiisalu aamma kingornagut nakkutilliisoqartarnissaa.

3. Zonenut agguataarinerit aningaasaqarnikkut allaffissornikkullu kingunerlutsitsisinnaapput

Siunnersuut sukumiisumik uani atuarneqarsinnaavoq.