Talittarfik assortuussutaasoq 2025-mi atorneqarsinnalissaaq
Sikuki Nuuk Harbourip nuannaarutigalugu nalunaarutigaa, Kangerlussuarmi umiarsualivimmi umiarsuit aqqutaata imartap naqqani siorartaajaaneq ukioq manna pilersaarutaasutut naammassimmat. Immap naqqata siorartaajarneqarnera Namminersorlutik Oqartussat sinnerlugit Polar Divemit ingerlanneqarpoq.
Foto: Polar Dive
Kangerlussuup umiarsualivianut ajornartorsiuteqarani tulattoqarsinnaanngorpoq.
Umiarsuit aqqutaat ukioq manna siorartaajarneqarsimasoq, massakkut 24 meterinik silinnerulertinneqarpoq ulinnerpaasarfia tininnerpaasarfialu agguaqatigiisillugu 3,5 meterit 5 meterillu (MV) akornanni itissuseqalersinneqarluni.
- Taakkua saniatigut umiarsualiviup tamarmiusup itissusaa, ulittarnerup tinittarnerullu agguaqatigiisinnerani 5 meterimik (MV) itissuseqalersillugu seerartaajarneqarpoq. Umiarsuit aqqutai taamaalillutik taama iliuuseqartoqareerneratigut atorneqaqqissinnaalerput, angallatillu mikinerusut talikkiartorsinnaalerlutik, Sikuki Nuuk Harbour tusagassiuutitigut nalunaaruteqarluni allappoq.
Immap naqqanik siorartaajaaneq 2025-imi naammassissasoq ilanngullugu allaaseraat. Ukiuuneralu qaangiuppat suliaq nangeqqissinnaalerniariarpat aallartinneqaqqissasoq.
Suliap naammassinissaanut umiarsuit aqqutaat katillugu 38 meterisut silitsigisunngortinneqassaaq, immallu itissusaa ulittarnerup tinittarnerullu agguaqatigiisinnerani minnerpaamik 4,5 meterinngortinneqassalluni (MV).
