Tasiilami savilerluni saassussineq
Politiit nakkutilliisuisa pisortaat Aputsiaq Hansen oqaluttuarpoq sapaatip akunnerata naanerani tallimanngornermiit arfininngornermi ullaap tungaanut sanilliullugu ulloq unnuarlu maannamut eqqissisimanarnerusimasoq. Taamaattorli Tasiilami aalakoornartumik imigassartorsimanermut atatillugu angerlarsimaffimmi eqqissiviilliortoqarnerani savilersornertalimmik saassussisoqarsimasoq.
Assiliisoq: Leiff Josefsen
- Tallimanngornerup aarfininngornerullu ullaavata tungaanut sanilliullugu arfininngornerup sapaatillu akornanni maannamut eqqissisimanarneruvoq, politiit ornigullutik suliaqartut amerlassusaat eqqarsaatigalugu, Kalaallit Nunaanni Politiini nakkutilliisut pisortaat, Aputsiaq Hansen oqaluttuarpoq.
Savimmik saassussisoqarneratigut qungatsimigut kilertoq
Taamaattorli Tasiilami angerlarsimaffimmi aalakoornartumik imersimanermut attuumassuteqartumik eqqissiviilliornermi savilerluni saassussisoqarsimavoq.
- Arfininngornermi nal. 15:52 politiinut nalunaarutiginittoqarpq angerlarsimaffimmi eqqissiviilliortoqartoq inullu savimmik tigummiaqartoq. Nalunaaruteqartoq paasissutissanik annertunerusunik tunniussisinnaasimanngilaq. Taamaattorli Tasiilami politiit angerlarsimaffimmut ornigutsinneqarput.
- Politiit angerlarsimaffimmut iseramik, inuk qungatsimigut kilersimasoq nassaarivaat, inuk napparsimavimmut ingerlateqqinneqarpoq pinerluttorlu tigusarineqarluni kingusinnerusukkut ullumikkut eqqartuussivimmi sassartinneqassaaq tigummigallagassanngortinneqarnissaa siunertaralugu, vagtchef Aputsiaq Hansen Sermitsiamut oqaluttuarpoq.
Nuummi imigassartorsimalluni biilertoq ataaseq, sinerissamilu eqqissisimanerusoqarluni
Kalaallit Nunaanni Politiini nakkutilliisut pisortaat Aputsiaq Hansen oqaluttuarpoq arfininngornerup sapaatillu akornanni nal. 04:00 missaani nalunaarutiginnittoqartoq biili aputaajaanermi aputip katersuunneqarfianut aporsimasoq.
Politiit ornigupput, biilertorlu suli tassaniippoq, taanna napparsimavimmukaanneqarpoq aaversillunilu, imigassartorsimasoq takussutissaqarmat.
- Taakku eqqaassanngikkaanni sinerissami tamarmi eqqissisimaneruvoq ullut siuliinut sanilliullugu, nakkutilliisut pisortaat oqaluttuarpoq.
