Tasiilami timigissartarfimmi maskiinat nutaat 15-inik ukiulimmut Vittusimut takorluugaqalersitsipput: - Imaassinnaasoq unammisalernissamut iluaqutaasinnaasut
Tasiilami timigissartarfiup nutaap ammarneqarneranut atatillugu nukkassartartoq takutitsivoq, qatserisartullu biilii uniarneqarlutik. Inuusuttuttaaq nukkassarnissamut periarfissarissaarneruleramik siunissamut takorluugaqarluarsinnaalerput.
15-nik ukiulik Vittus Taunajik Tasiilami illoqarfiup qeqqani qatserisartut biiliinik 4,5 tonsimik oqimaassusilinnik uniarluni apuuffissaminut apuummat inuit nuannateqaat.
Assiliisoq: Oscar Scott Carl
Tasiilami
tallimanngornermi seqinnarissuaq inuppassuit qatserutaasiviup eqqaanut katersuupput. Nukkassartartup Nukappiannguaq
Vetterlainip timigissartarfimmi atortut nutaat atoqqaartinneqarnerannut
atatillugu biilit qatserutit uniarniarai inuit alapernaaffigaat. Illoqarfimmiullu
unammillernissaminnut periarfissinneqartunut ilaapput.
- Arlaata
Nukappi ajorsartissinnaappagu maanngaqqilerutta ilaginavianngilarput, Allan
Juhl illarlunilu oqarpoq.
Nukappiannguaq Vetterlainip biilit qatserutit 4,5 tonsit uniarpai.
Assiliisoq: Oscar Scott Carl
Aalanerunissaq anguniagaavoq Tasiilami ulloq
nuannaffiuvoq. Timigissartarfik nutaaq ullukkut atoqqaartinneqarmat meeqqat
inuusuttullu takuniaasut imaaginnavipput.
Allan Juhlip Fitness
GL-illu timigissarnermi maskiinat illoqarfimmut 2024-mi tunniuppaat. Suliniummi
Patrick Abrahamsen ataqatigiissaarisuuvoq, Kommuneqarfik Sermersuup
suleqataaneratigut maskiinat nutaat timersortarfimmi inissinneqartut.
Nukkassaatit timigissaatillu nutaat Tasiilarmiunut iluaqutaassasut neriuutigineqarpoq.
- Aalanerulernissamut
iluaqutaaqqunarput. Inuit atortut nutaat sungiutipallassagaat neriuutigaarput,
taamaalilluni ulluinnaannut ilaalerniassammata, Allan Juhl oqaluttuarpoq.
Tasiilami innuttaasut maskiinat nutaat qanoq atorneqarnissaanik ilitsersuunneqarput.
Assiliisoq: Oscar Scott Carl
Timigissartarfiup
immikkoortuata nutaap atoqqaartinnissaa ulluni kingullerni ulapputigineqaqaaq.
Atortut pitsaanerpaamik qanoq atorneqarsinnaaneri Allan Juhlip innuttaasunut ilitsersuussutigai.
Pikkorissaqataasunut ilaavoq 15-inik ukiulik Vittus Taunajik.
Nukappiannguaq Vetterlainip 270 kiilu kivikkamiuk illoqarfimmi nutaamik rikoortiliorpoq.
Assiliisoq: Oscar Scott Carl
- Nuannaaqaanga ammarnera
peqqutigalugu. Trænertarniarama. Maskiinat atorlugit sukkanerusumik nukkassarsinnaalerpunga.
Vittus oqarpoq.
Nukittoorsuimmi
unammisarnerannut siunissami peqataasalerusuppoq.
- Imaassinnaasoq
unammisalernissamut iluaqutaasinnaasut. Deadliftimi unammisalerusuppunga, Vittus
oqarpoq.
Maskiinat nutaat misilinniarlugit meerarpassuit takkupput.
Assiliisoq: Oscar Scott Carl
Qangalili takorluugaavoq Patrick Abrahamsen
Tasiilami peroriartortoq suliniummi ataqatigiissaarisuuvoq. Taassuma Tasiilami timigissarnermut
periarfissagissaarnerulernissaa illoqarfimmi politiiunermi nalaani 2013-imi
takorluugarileqqaarpaa. Isumassarsiap takkunneranit ukiut aqqaneq-marluk qaangiuttullu
takorluugaq piviusunngorpoq.
- Upperiuminaappoq
kiisami iluatsinnera. Neriuppunga inuusuttut, soorlu Vittusitut ittut allanik
periarfissaqarnera takulerumaaraat. Siornatigut timersortartuinnaat
timigissartarfik atortarpaat, maannakkulli maskiinat nutaat
periarfissiineritigut timersortartuinnaanngikkaluartut atuisinnaalerput.
15-inik ukiulli 4,5 tonsi uniarpaa
"Wooow" Vittus Taunajiup qatserisartut biiliat 4,5 tonsi uniarlugu aallartimmagu meeqqat taama nillerrapput. Vittusip Nukappiannguaq Vetterlain nuannaartoraa, qatserisartullu biiliat uniarusunnerini aperimmat itigartissinnaanngilaa.
- Sakkortulaarpoq. Taaneqarama
pissangaleraluarpunga. Soorluluunniit artussallugit. Ingerlakkakkit
ilungersornaqaaq, Vittus Taunajik tanngassimaaqisoq Sermitsiamut oqarpoq.
Nunap immikkoortortaani pisortap Hjørdis Vibergip (saamerleq) timigissartarfik atoqqaartippaa. Sanianiippoq suliniummi ataqatigiissaarisoq Patrick Abrahamsen, taanna tungujortumik tujuuluaraqarpoq.
Assiliisoq: Oscar Scott Carl
