Tasiilap eqqaani inuit arfineq-pingasut annaanniarlugit annaassiniarneq aallartinneqartoq

Qulimiguulik Tasiilap kangiata tungaanut maannakkorpiaq ingerlaarpoq inunnik arfineq-pingasunik annaassiniartinneqarluni. Inuit arfineq-pingasut pineqartut umiatsiamik ippassarli angalalersimapput, imaanili sikorsuaqarneranit ingerlariaqqissinnaajunnaaramik ikioqqusimallutik.

Qulimiguulik Tasiilap kangiatat ungaanut maanna ingerlaarpoq, inuit arfineq-pingasut umiatsiamik ingerlariaqqinneq ajulersut annaakkiartorlugit.

Kalaallit Nunaanni Politiit maanna annaassiniaanermik aallartitsipput arfineq-pingasut Tasiilap kangiatungaani umiatsiamik ingerlariaqqissinnaajunnaartut annaanniariartorlugit.

Kalaallit Nunaanni Politiini pigaartut pisortaat, Jaaku Andreassen Sermitsiamut taama ilisimatitsivoq.

- Inuit arfineq-pingasut ippassarli pingasunngornermi aallarsimapput, sikorsuaqarneranili ingerlariaqqissinnaajunnaarsimallutik. Paasisagut naapertorlugit inuit taakku maanna sissamut pisimalerput, Jaaku Andreassen Sermitsiamut oqaluttuarpoq.

Kalaallit Nunaanni Politiit nalunaarummik sisamanngorneq 20. juni ullaakkut nal. 06.30 missaani tigusaqarsimapput. Pigaartut pisortaat oqaluttuarpoq paasisat naapertorlugit angalasut umiatsiaat motorimigut ajornartorsiulersimasoq ilanngullugu nalunaarutigineqarsimasoq.

Ajoqusertoqanngilaq

Pigaartut pisortaata ilisimatitsissutigaa inuit maanna annaanniarneqartut ajoqusersimasoqanngitsut.

- Ilisimakannerparput sumiiffigisaat, nanineqalertorsinnaappullu. Taamaattumik qulimiguulik sumiiffimmut aalajangersimasumut maanna ingerlaarpoq. Naatsorsuutigaara annaassiniarnermut suliaq ullup qeqqareersimanerani naammassissasoq, Jaaku Andreassen oqarpoq.

Pigaartut pisortaat ilisimatitsivoq annaassiniarneq naammassereersimalerpat maanna ujaarineqartut killisiorneqarumaartut susoqarsimanera pillugu.

Powered by Labrador CMS