Taxanik ingerlatsinermut malittarisassat suliarineqarnerat kinguaattoorutaasut

Taxartartut sumiiffinni arlalinni siorna akerliussutsimik takutitsipput.

Taxartartut kommunimit malittarisassiorneqartarnikuugaluarlutik taamaattoqartarunnaarnera naammaginagu akerliussutsimik takutitsisoqarpoq.

Malittarisassaqannginera peqquserlunnermik kinguneqarpoq, inuimmi namminneq aningaasarsiutigalugu biiliussisinnaammata. Assersuutigalugu biiliussisinnaasut Facebook aqqutigalugu nittarsaassisarnerat ilaatigut isorineqarpoq.

Taxartartutut inuussutissarsiutillit isornartorsiutaat aaqqiviginiarlugit malittarisassat nutaat suliarineqarniaraluarput, aasaq mannalu juulip aallaqqaataani atuutilernissaat siunniunneqaraluarluni.

Qinersineq pissutigalugu kinguaattoorneq

Taamatulli pisoqarsimanngitsoq ineqarnermut, attaveqaasersuutinut isorliunerusunullu naalakkersuisoq Aqqaluaq B. Egede (IA) Inatsisartunut ilaasortamut Jens Napãtômut (N) allakkatigut akissuteqarnermini ilisimatitsivoq.

ATUARUK AAMMA

Taxa-nut malittarisassat nutaat siunnersuutigineqartut akerleriissutigineqartut

Malittarisassat nutaat Danmarkimi Transportministereqarfimmit, tamatumunnga akisussaasumit, tusarniaassutigineqarsimasut Naalakkersuisoq nassuiaavoq. Tamatuma kingorna tusarniaanermi akissutigineqartut arlallit tunngavigalugit suliaq aaqqissuunneqarpoq, taamaaliortoqareermallu ineqarnermut, attaveqaasersuutinut isorliunerusunullu naalakkersuisoqarfik suliamik 2025-mi februaarimi oqaaseqarnissamut periarfissinneqarpoq.

- Nalunaarut atortuulersinneqarnissaa sioqqullugu Transportministeriaqarfiup qulaajarneqartariaqartutut isigaanik, siunnersuut apeqqutinik arlalinnik ilaqarpoq. Qinersinissap suaarutigineqarnera patsisaalluni siunnersuut, apeqqutillu isummerfigineqarsinnaasimanngillat, Aqqaluaq B. Egede nassuiaavoq, nangillunilu:

- Transportministeri Thomas Danielsen maajimi naapippara, siunnersuullu annikitsumik allannguiffigalugu atortuulersinneqassasoq tassani noqqaassutigalugu. Nalunaarut qaqugu atortuulersinneqarsinnaassanersoq pillugu piffissaliussamik nutartikkamik Naalakkersuisoqarfiga Transportministeriaqarfimmit tigusinikuunngilaq.

Soqutiginngikkaat?

Taxanik ingerlatsineq taama sivisutigisumik malittarisassaqannginnera pisussissamisoornersoq, Naalakkersuisullu tamanna sooq soqutiginnginneraat Jens Napãtôp paaserusuppaa.

Pineqartoq naalagaaffiup akisussaaffigigaa Aqqaluaq B. Egedep nassuiaatigaa:

- Angallannermut suliassaqarfik naalagaaffiup akisussaaffigaa. Naalagaaffeqatigiinnermi oqartussaasut malittarisassanik suliaqarnissaannik qinnuigissallugit, Naalakkersuisut suliassaraat. Suliassaqarfik piaartumik malittarisassiuunneqassasoq siulima, uangalu noqqaassutiginikuuarput, naalakkersuisup akissutigaa.