Timmisartoq anguneqariaannaanngitsumi nakkarsimasoq nassaarineqarpoq
Timmisartoq periarfeerunneqartoq nakkarsimasoq nassaarineqartoq Naviair nalunaarpoq. Annattoqanngilaq.
Ujaasineq Nuup eqqaani Sermitsiap nalaani pivoq. Weekendimi putsernera erseqqarlunneralu qaangiullutik ataasinngornermi allaaqqissivoq, oqartussallu timmisartup nakkarfiata sumiinnera paasivaat.
Assi: Morten Okkels
Timmisartoq Nuup eqqaani periarfeerunneqartoq nassaarineqarpoq.
Ajutoorfiusoq oqartussanit ullaaq manna sumiissusersineqartoq Naviair nalunaarpoq.
- Ajoraluartumik annattoqanngilaq, Naviair allappoq.
Issittumi Sakkutooqarfik, Kalaallit Nunaanni Politiit, Air Greenland kiisalu illoqarfimmi upalungaarsimasut ujaasinermi ikiuunnerat Naviairimit qujaffigineqarpoq.
Ilaqutaasut ilisimatinneqarsimapput, suliarlu politiinut tunniunneqartoq Naviairimit aamma paasissutissiissutigineqarpoq.
Timmisartoq Sermitsiap eqqaani arfininngormat ualikkut periarfeerunneqartoq ataatsimik ilaasoqartoq Naviairimit sapaatiummat paasissutissiissutigineqarpoq. Inuup ataatsip ilaasuusimanera Naviairimiit Sermitsiamut ataasinngornermi uppernarsarneqarpoq.
Anguneqariaannaanngitsumut nakkarsimasoq
Apeqqutit allat Kalaallit Nunaanni Politiinut saaffiginnissutigeqqullugit Naviairimit innersuussutigineqarpoq. Timmisartoq Sermitsiami nassaarineqartoq politikommissær Brian Thomsen oqarpoq:
- Qaqqami Sermitsiami nassaarineqarpoq, kisiannili sumiiffia anguneqariaannaanani. Taamaattumik oqartussat maanna iliuuseqarsinnaanertik ajornakusoortippaat, Kalaallit Nunaanni Politiineersoq Brian Thomsen Sermitsiamut oqarpoq.
Ajunaarnernut ataatsimiitsialiarsuarmiit misissuiffigineqassasoq
Timmisartuaraq Nuuk qulaallugu arfininngormat avannamukaartoq nittartakkatigut Flightradarikkut takuneqarsinnaavoq. Timmisartuaraq kingorna qeqertap Sermitsiap eqqaani tammarpoq.
Timmisartoq Canadamiit Kalaallit Nunaannukartuusoq Naviairimit nalunaarutigineqarnikuuvoq. Timmisartup arfininngormat periarfeerunneqarnerata nalaani silarluppoq.
Ajutoornerup nalaani susoqarsimanersoq ajunaarnernut ataatsimiitsialiarsuarmiit misissuiffigineqassasoq politiit uppernarsarpaat.
