SAR-IMIK SULIAQARNEQ
Timmisartoq nunanit allaneersoq Nuup eqqaani ajutoorsimassagatinneqartoq - ujaasineq sapaatiuppat ullaap tungaanut unitsinneqarallarpoq
Timmisartoq minnerumaaq ataatsimik motooriliik nunanit allaneersoq arfininngornermi ualikkut ajutoorsimassagatinneqartoq ujaarineqarpoq.
Qulimiguulik annaassiniarluni atorneqartartoq timmisartorlu Sermitsiap eqqaani arfininngornerup ualigaa angalaarput.
Assi: Morten Okkels
Arfininngornermi nal. 18.35 nutartigaq: Nuummi silarlunnera erseqqarlunneralu pissutaallutik ujaasineq unitsinneqartoq Naviarimit paasissutissiissutigineqarpoq. Sapaatiuppat ullaakkut nangeqqinneqassaaq.
Nuup eqqaani arfininngornermi ujaasisoqangaatsiarpoq.
Silaannakkut angallannermik nakkutilliisoqarfik Naviair naatsumik nalunaaruteqarpoq:
- Naviairimit Issittumi Sakkutooqarfik politiillu suleqatigalugit timmisartumik nunamit allameersumik Nuup eqqaani ajutoorsimasorineqartumik ujaasisoqarpoq.
Maannamut amerlanerusunik paasissutissaateqannilagut.”
Timmisartoq ataatsimik motoorilik ujaarineqartoq Naviarimit Sermitsiamut ilisimatitsissutigineqarpoq.
Nuup avannaata tungaani qeqertap Sermitsiap eqqaani qulimiguulik timmisartorlu akunnerni kingullerni ujaasipput.
Issittumi Sakkutooqarfiup umiarsuaa nallutilliissut Knud Rasmussen sumiiffimmiittoq Skibstrafik.dk-mi aamma takuneqarsinnaavoq.
Aaqqissuisoqarfimmiit Issittumi Sakkutooqarfik aamma Kalaallit Nunaanni Politiit attaveqarfigaavut, taakkualu tamarmik ujaasinermik aqutsisunut Naviairimut innersuussipput.
Timmisartuaraq ataatsimik motoorilik ujaarineqartoq sulilu nassaarineqanngitsoq, Naviair nalunaaqutaq 16.30 missaani nalunaarpoq.
Naviair timmisartumut ilaasut qassiusimanerannik paasissutissaateqanngilaq.
