Naalakkersuisoq qallunaat ministeriannut: Utoqqatserlusilu taarsiissuteqaritsi
Meeqqanut, inuusuttunut ilaqutariinnullu naalakkersuisup Mads Pedersenip naalagaaffiup inatsisitigut ataataqanngitsunut qitornavissianngortinneqarnikunullu ikiuiniarnera isumaginninnermut ineqarnermut ministerimut Sophie Hæstorp Andersenimut ammasumik allakkamini isornartorsiorpaa.
Meeqqanut, inuusuttunut ilaqutariinnullu naalakkersuisup Mads Pedersenip inatsisitigut ataataqanngitsut qitornavissianngortinneqarnikullu taarsiivigineqarnissaat piumasaraa.
Foto: Jensine Berthelsen
- Kalaallinut meeraanerminni inatsisitigut naapertuilluanngitsumik qitornavissianngortitsinneqarnikunut taarsiissuteqarnissaq pillugu aalajangiinerup assut ajuusaarutiginera aammaarlunga oqaatigalugu aallarniutigerusuppara.
Taama meeqqanut, inuusuttunut ilaqutariinnullu naalakkersuisoq Mads Pedersen (IA) Danmarkimi isumaginninnermut ineqarnermut ministerimut Sophie Hæstorp Andersenimut (Socialdemokraterne) ammasumik allakkamini aallarniivoq.
Kalaallit qitornavissianngortinneqarnikut sisamat qallunaat naalagaaffianut taarsiivigeqqunerat juunimi itigartitsissutigineqarnera pillugu taama allappoq. Taakku angajoqqaavi pinngitsaalillugit imaluunniit sumut atsiornertik paasisimanagu akuersitinneqarsimasut misigaat.
- Aalajangiineq inatsisitigut itigartitsinerinnaanngilaq, meeqqammi qitornavissianngortinneqarnikut aamma inuttut itigartinneqarput. Inuunerminni aqqusaarsimasaat, kinaassusaat inuttullu naleqassusaat nassuerutigiumaneqanngilaq. Naapertuilluanngitsumik qitornavissianngortineqarnikkut taakkualu ilaqutaasa misiginikuusartik inuunertik tamaat nammappaat, Mads Pedersen allappoq.
Inatsisitigut ataataqanngitsut utoqqatserfigineqassapput
Arnat akuersiteqqaarnagit spiralilerneqarnikut qanittukkut utoqqatserfigineqarnerattut inatsisitigut ataataqanngitsut aamma utoqqatserfigineqarnissaat pissusissamisoortoq aamma isumaqarpoq.
Kalaallit Nunaanni 1900-kkunni meeqqat uersakkat tusindilikkaat inatsisitigut akimmiffeqarneq pissutaalluni ataataminnut attaveqarsinnaatitaanngillat. Taamaattumik inatsisitigut ataataqanngitsut 26-t naalagaaffimmiit taarsiivigineqarnissamik piumasaqarput, tamannali 2023-mi itigartinneqarpoq. Taakku naalagaaffik kingorna eqqartuussivimmut suliassanngorlugu tunniuppaat.
- Meeqqat taakku sumi qangali inunngornikuunertik pissutigalugu immikkoortinneqarnikuupput, nikagineqarnikuullutik meeqqaniillu allanit pisinnaatitaaffikinnerusumik pineqarnikuullutik. Meeqqat maanna perornikuupput, danskilli naalagaaffiata inatsiseqarnikkut kukkunerata kinguneri suli nammappaat, Mads Pedersen allappoq.
Suliat ammaqqinneqarlik
Meeqqap pisariaqartitai siulliunneqartuaannarnissaat aamma tikkuarpaa, sulianilu taakkunani taamaattoqarsimanngitsoq taanna isumaqarpoq.
- Qanga iliuutsit naapertuutinngitsut inatsisillu amigaateqarnerat pissutaallutik qitornavissianngortinneqarnikut inatsisitigullu ataataqanngitsut ikilerneqarnikuupput artorsaatissillugit.
- Taamaattumik danskit naalagaaffiannit taakkununnga ilaqutaannullu sumiginnaasimaneq nassuerutigineqarlunilu taarsiissuteqartoqartariaqartoq taamaammat isumaqarpunga.
Inatsisitigut ataataqanngitsut utoqqatserfigineqarnerisigut qitornavissianngortinneqarnikunullu suliat ammarneqaqqinnerisigut pissaaq.
