Timmisartoqarfiup illorsuartaavani angalasut nassataannik assartuut ajornartorsiutaaqqippoq
Nuummi timmisartoqarfimmi illorsuartaap nassatanik tunniussisarfia marlunngornermi ajornartorsiutaaqqippoq.
Timmisartoqarfiup illorsuartaavata angalasut nassataannik assartuutaa suli ajornartorsiutaavoq.
Assiliisoq: Jesper Hansen
Timmisartumik angalasut marlunngormat nassataminnik tigusiniarlutik sivisuumik utaqqisariaqarsimapput, “ajoraluartumik taskeq nassatanut assartuummut kiggigussimammat, tamatumalu kingunerisaanik nassatanik assartuut unittoormat”, Juaannannguaq Lennert, Greenland Airportsimi attaveqaqatigiinnermi sulisoq, Sermitsiaq.AG-mut taama ilisimatitsivoq.
- Ataavartunik utaqqiisaasunillu aaqqiissutissarsiniarluta tamaviaarpugut, pissutsillu ingerlalluarnissaannik sulisut qulakkeerinninniarlutik sapinngisartik tamaat iliuuseqarput, attaveqaqatigiinnermi sulisoq oqarpoq.
Ajuusaartoq
Ilaasut utaqqinerusariaqarnerat soorunami timmisartortitseqatigiiffiup ajuusaarutigigaa oqarpoq, „suliniarpugulli, illorsuartaallu unammillernartui ilisimavavut“.
Ilaasut nassatanut assartuummut qaqinissaannut aarlerisaarivoq, tamassumami navianarpallaarnera pissutigalugu inerteqqutaammat.
- Ilaasartaatitta illorsuartaami pitsaanerpaamik misigisaqarnissaannik qulakkeerinninniarluta nassatat pillugit nalunaarut nalinginnaanerusoq naammassileruttoripput aamma ilisimatitsissutigisinnaavara, Juaannannguaq Lennert oqarpoq.
Aallartisarneq
- Soorlu inoqatinut attaveqaatitigut siusinnerusukkut nalunaarutigisimagipput, sanaartukkami imaannaanngitsumi aallartisarneq ilimaginngisatsinnik ajornartorsiuteqalersitsisinnaasarpoq, ajornartorsiuteqalernaveersaarnissarli ajornartorsiuteqaleraangallu piaartumik aaqqiinissaq qulakkeerniarlugu Greenland Airports suliuarpoq.
