Timmisartumik aqqut nutaaq: New Yorkimit Nuummut aqqut piviusunngussaaq
Amerikamiut timmisartortitseqatigiiffiat United Airlines aasarumit New Yorkip Nuullu akornanni aalajangersimasumik timmisartuussisalissaaq.
Timmisartoq imaattoq, Boeing 737 MAX 8, United Airlinesip Newarkip Nuullu akornanni timmisartuussissutigissavaa.
Assiliisoq: United Airlines
2025-mi juunip 14-iannit sapaatip-akunneranut marloriarluni New Yorkimi Newarkimit Nuummut utimullu timmisartuussisalernermikkut Amerikamiut timmisartortitseqatigiiffiata Air Greenland qaangerniarpaa.
Timmisartortitseqatigiiffiup nittartagaani tusagassiuutinut nalunaarummi allassimavoq timmisartortitseqatigiiffiup angalaffissat arfineq-marluk, ilaatigut Nuuk, Mongolia, Senegal, Taiwan Europamilu illoqarfiit ilaat angalaffigisalerniarai.
United silarsuarmi timmisartortitseqatigiiffiit annersaraat, New Yorkilu aqqusaarlugu kalaallit nunarsuup sinneranut timmisartornissamut periarfissaqalissapput, timmisartortitseqatigiiffimmi nunat tamalaat akornanni ornittakkanut 147-nut ullormut 800-riarluni timmisartuussisarmat.
Piffissaq angalaffiusussaq
Aqqut nutaaq nalunaaquttap-akunnerini sisamani ingerlaarfiussasoq pillugu timmisartortitseqatigiiffik ima allappoq:
- Piffissaq aalajangersimasoq malillugu sapaatip-akunneranut marloriarluni New Yorkimi Newarkimit illoqarfiit pingaarnersaannut Nuummut toqqaannartumik timmisartuussineq aqqutigalugu angalasut maannakkut Kalaallit Nunaanni issittumi misigisassarsiorsinnaalissapput. United timmisartortitseqatigiiffinni kisiartaalluni USA-mit Nuummut toqqaannartumik timmisartuussisassaaq – nunarsuarmi illoqarfiit pingaarnersaanni avannarlersaq, aasaanerani seqernup kaaviinnarfiani uumasunik alutornartunik takuniaaffigalugu pisulluni angalaarfigineqarsinnaasumut.
Nangilluni ima allappoq:
- Nuummi mittarfik nutaaq qaammatip tulliani ammarneqassaaq, Unitedillu timmisartuutaa nutaaq toqqaannartoq atorlugu Amerikamiut angalasut nalunaaquttap-akunneri sisamat missaat timmisartorlutik Kalaallit Nunaat aatsaat taama tikeriaannanngortigissavaat.
