Timmisartut nunanit tamalaaneersut Kangerlussuup mittarfianut minniarunik namminneq akiliisassapput

Danskit illersornissamut oqartussaasui Kangerlussuup mittarfiata annertussusaata attatiinnarnissaanut aningaasaliissuteqarusuttut, timmisartut angisuut missinnaanissaat minillugu, Illersornissamut ministerip Troels Lund Poulsenip Nuummi tikeraarnermini oqaluttuaraa. 

Siunissami mittarfimmik atuisut mittarfimmut minnissaminnut namminneq akiliisassasut Ineqarnermut Attaveqaasersuutinullu Naalakkersuisoq Hans Peter Poulsen (S) maanna oqarpoq.

-Allat minniarpata nunanit allaninngaanniit taava uagut akilissagivut pilersaarutaanngilaq, taakkuli akiliillutik periarfissaq taanna atortassagaat, Hans Peter Poulsen (S) oqarpoq.

Naalakkersuisut aamma danskit illersornissaqarfiata mittarfiup siunissami atorneqarsinnaanera pillugu misissuinerminni kinguaattoornerat pissutaalluni, Kangerlussuarmi mittarfiup siunissami timmisartuutileqatigiiffinnit nunanit tamalaaneersunit mittarfittut atorneqarsinnaanera suli nalornissutigineqaleraluarpoq, Qeqqata Kommuniani takornariartitsisartut inuussutissarsiortullu akornanni oqallisigineqartorujussuulluni.

Qeqqata Kommuniani takornariartitsisartut inuussutissarsiortullu kattuffiata Arctic Circle Businessip timmisartut nunanit tamalaaneersut Kangerlussuarmut missinnaanissaat pillugu erseqqissumik nalunaaruteqartoqarnissaa ujartorpaat, nalornisoqarnerani umiarsuarnik takornariartaatinik ingerlatsisut Kangerlussuarmi ilaasunik paarlaassisarnissamik pilersaarusiorsinnaanerat ajornakusoormat imaluunniit isumaqatigiissusiorsinnaanngimmata.

Kangerlussuarmi mittarfik ingerlatiinnarniarlugu Mittarfeqarfiit A/S-ip februaarimi nalunaarutigaa, isumannaallisaanerli 1-miit 2-mut appartinneqassalluni. 

Tassa ilaasut Kangerlussuarmut tikittut timmisartumik allamut ingerlaqqittussat nassataminnik tunniusseqqittarnissartik nammineq isumagisalissallugu. 

Kangerlussuarmiit nunarsuarmi mittarfinnut tamanut timmisartuussisoqarsinnaalissasoq Mittarfeqarfiit A/S-imi pisortaq Henrik Estrup Sermitsiamut nassuiaavoq.

Timmisartumik mittoqassanersoq apeqqutaavoq

Nuummi nunat tamalaat akornanni mittarfissaq nutaaq novembarimi ammarneqarpat Kangerlussuarmi mittarfik nunap immikkoortuani mittarfittut inissinneqassasoq Ineqarnermut Attaveqaasersuutinullu Naalakkersuisoq Hans Peter Poulsen nassuiaavoq. Timmisartulli nunanit tamalaanit timmisartuussisartut Kangerlussuarmi mittarfimmi suli missinnaassasut.

-Kangerlussuarmi mittarfik mittarfiit sinerissamiittut allat assigalugit atulernissaa allannguutaavoq. Danskit aningaasaliinerisigut takissusia attatiinnarniarneqarpoq, mittarfik miffigisinnaajumallugu. Qularnanngitsumik illersornissamut suliassanut atatillugu. 

-Mittarfimmut tassunga allat mikkusulernissaa tassa apeqqutinngorpoq, Mittarfeqafiit A/S-illi oqarneratigut ajornartorsiutaanavianngilaq. Minniartulli allat assigalugit namminneq akiliisassapput. Mittarfiulli takissusaa apeqqutaalluni periarfissaq taanna piulerpoq, Hans Peter Poulsen oqarpoq.

Nuummi Ilulissanilu mittarfissualiornissaq aalajangiunneqarmalli Kangerlussuarmi mittarfik nunap immikkoortuani mittarfinngortinneqassasoq pilersaarutigineqarsimasoq taassuma erseqqissarpaa. Nunallu immikkoortuani mittarfiit nunanit tamalaanit timmisartunit atorneqarsinnaasut.

-Tunngaviusumik allaanerunngilaq. Sinerissatsinni mittarfiit aamma miffigineqarsinnaapput akuttuneruinnarunarpoq. Timmisartuutillit missimatillutik namminneq akiliisarput. Ukua massakkut isumaqatigiinniarnerit ingerlasut aalajangeeqataasussaapput annertussusissaanut. Inissippat allanik atuisussanut qanoq atorneqartigilissanersoq ersarississaaq, Hans Peter Poulsen oqarpoq.

Ineriartorneq Kangerlussuup pisariaqartinneqarneranik takutitsisoq

Kangerlussuarmi Narsarsuarmilu mittarfiit atorneqarsinnaanerannik oqallinnermi ineriartortoqarsimasoq Hans Peter Poulsen isumaqarpoq. Nuummi Ilulissanilu mittarfiliornissamik aalajangernerup kingorna, Ruslandillu Ukrainemut sorsulernerata kingorna, danskit illersornissaqarfiata Kangerlussuup mittarfiata atorneqarsinnaanera pisariaqartilersimavaa. Aamma amerikamiut illersornissaqarfiata pisariaqartilersimavaa.

-Danskit amerikamiuIlu illersornissaqarfii Kangerlussuarmik atuinissaminnut suli soqutiginnipput. Naalakkersuisut danskillu illersornissaqarfiat mittarfik qanoq atortigissanerlugu suli isumaqatigiinniutigaat. Taakku saniatigut takornariaqarnermik suliallit, ilisimatusartut Kangerlussuarminngaanniit aallaaveqartartut soqutiginnillutik, oqarpoq nangillunilu. 

-Tamaasa isigigaanni suliassaqarfiit assigiinngitsut pinngorput, ilusiminnik allanngoraluarlutik kisianni inuppassuit atuerusuttut tassaniittut sullinneqassallutik, Hans Peter Poulsen oqarpoq.

Mittarfeqarfiit A/S aappaagumiit aningaasanut inatsimmit aningaasaliiffigineqarnerulissaaq, Mittarfeqarfiit timmisartut nunanit tamalaaneersut Kangerlussuarmut mittarunnaarlutik Nuummut Ilulissanullu mittalerpata annaasaqaatigissagamikkit.

Mittarfeqarfiit 2024-mi aningaasanut inatsimmit 11,5 millionit koruuninik aningaasaliiffigineqassaaq, aappaagumiillu taavalu 2027-p tungaanut ukiuni missingiutini aningaasaliissutit 100 millionit koruuninut amerleriassallutik. 100 millionit koruuninik tapiiffigineqartuaannarnavianngitsoq Naalakkersuisoq isumaqarpoq.

-Naatsorsuutiginngilarput taamaattuaannassasoq. Apeqqutit akineqarsinnaanngitsut apeqqutaallutik, tassa mittarfissuit nunatsinnut kingunissai qanoq issanersut. Nunatta sinneranut iluaqutissartai, angallannermut sunniutissai maanna piareersarlugit ingerlanneqarput. Naammassippata Inatsisartunut saqqummiunneqassapput, Hans Peter Poulsen oqarpoq. 

Air Greenlandip Ilulissani Nuummilu mittarfiit nutaat ammarpata nunap iluani timmisartuussinerit amerlinissaat pilersaarutigigaa ilanngullugu tikkuarpaa.

Kiffartuussinermik isumaqatigiissutit nutarterneqartut

Innuttaasut angalanissamut periarfissaqarnerulernissaat siunertaralugu piareersarnerit ilaat tassaasoq kiffartuussinissamut isumaqatigiissutit nutarterneqarnissaat, Hans Peter Poulsen nassuiaavoq.

-Takorloorneqarsinnaagami akilersinnaanngitsutut isigisarnikuusagut allannguinerup kingunerisaanik immaqa aamma akilersinnaalersimassasut, siammarterinerup malitsigisinnaasai tunngassuteqarami, taamaassappat kiffartuussinissamik isumaqatigiissutit allanngortitertariaqarput, Hans Peter Poulsen oqarpoq.