Timotheus Petersen: Kullorsuaq illoqarfinngortariaqarpoq

Upernaviup eqqaani nunaqarfiit annersaat avannarlersaallu Kullorsuaq Kalaallit Nunaani nunaqarfiit piniartoqarfiusut aalisartoqarfiusullu annersaraat, maannakkullu 450-it missaannik inoqarluni.

Ukiullu kingulliit ingerlaneranni aalisarnermik inuussutissarsiuteqarnerup ineriartornera ilutigalugu nunaqarfiup ineriartortinneqarnissaa pisariaqartoq, taamaattumillu illoqarfinngortinneqarnissaa pillugu politikkikkut suliniutit qinigaaffimmi tullermi aallartinneqartariaqartut, Timotheus Petersen, Siumut, Avannaata Kommuniani kommunalbestyrelsimut ilaasortaq oqarpoq.

Taanna nunaqarfimmi aqutsisunut kommunalbestyrelsimut Inatsisartunullu maanna qinigassanngortippoq.

Ineriartortoq unammilligassaqartorli

Arctic Fish Greenland A/S ukiuni kingullerni aalisakkanik tunitsiveqarnikkut malunnaatilimmik inerisaasimavoq, ukiunilu aggersuni nutaamik aalisakkeriviliornissamik pilersaaruteqarluni. Taassuma saniatigut illut arlallit, taakkununnga ilaallutik atuarfeqarfimmi atorfilinnut inissiat, meeqqerivillu nutaaq aamma sanaartorneqarnikuupput, ukiorlu manna talittarfeqarnikkut aamma inerisaasoqarluni.

Ukiut kingulliit sanaartortoqaraluartoq suli inissaaleqisoqarpoq, tassanilu inuusuttut ilaqutariillu meerartallit annertuumik pisariaqartitsipput.

Illut nutaajunerusut pisortallu illuutaasa ilai erngup aqqutaanut attaveqaraluartut, Kullorsuarmi kuuffinnut aqqusersuisoqarnikuunngilaq, taamaattumillu illut tamarluinnarmik suli igittakkanik arnartarfeqarput. Nunaqarfimmi aqqusernit aserfallassimaqisut asfalteqanngillat, nunaqarfimmilu biileqanngimmat anartarfinnik igittakkanik eqqakkanillu assartuineq suli annertuumik ajornartorsiutaavoq, minnerunngitsumillu nunaqarfimmiit nunaqarfimmullu silaannakkut imaatigullu aqqutit pitsaasuunnginneri pissutaalluni, nioqqutissanik pilersuineq, annermik ukiukkut, suli annertuumik ajornartorsiutaavoq. 

Piumasaqaatinik naammassinnittoq

Kullorsuup illoqarfinngortinneqarnissaa pillugu oqallinneq nutaajunngilaq, ullorli manna tikillugu tigussaasumik iliuuseqartoqarnikuunngilaq. Kullorsuarmi innuttaasut amerlasussaat appariartarlunilu qaffariaqartarpoq, siornalu nunaqarfik 470-it missaannik inoqarpoq. Tassunga sanilliullugit Ittoqqortoormiit maannakkut 324-nik Kangaatsiarlu 481-nik inoqarput.

- Kullorsuarmi aalisarnermik inuussutissarsiuteqarnerup aalisakkanillu tunisassiornerup ineriartortinnissaanut periarfissarissaarpoq, illoqarfiillu allat mikinerusut ilaannut naleqqiullugu inuussutissarsiornikkut ineriartortitsivigissallugu periarfissarissaarnerusutut allaat oqaatigineqarsinnaavoq.

- Aammali ilaatigut nakorsaqarsinnaanermut, palaseqarsinnaanermut inunnillu isumaginninnermi sulisussanik atorfeqartitsisinnaanermut inuttussuseq aallaavigalugu piumasaqaatit qaangereersimavagut, taanna oqarpoq.

Kullorsuarmi innuttaasut 450-it missaanniittut affaai sinnerlugit 30-it tungaanut ukioqarput, taamaattumik meeraaqqeriviit meeqqeriviit timersortarfeeqqat allallu siunissami suli annertunerusumik pisariaqartinneqalerumaartut, taanna isumaqarpoq.

- Innuttaasunut pitsaanerusumik atugassaqartitsinissaq qulakkeerneqassappat, inuusuttunut meeqqanullu atugassarititaasut pitsaanerusariaqarput, Timotheus Petersen oqarpoq.

Suliaq aallartinneqartariaqartoq

Suli annertuumik unammilligassaqaraluartoq Kullorsuup illoqarfinngortinneqarnissaa pillugu suliaq qinigaaffimmi tulliuttumi pimoorullugu aallartinneqartariaqartoq, Avannaata Kommuniani kommunalbestyrelsimut ilaasortaq oqarpoq.

- Illoqarfinngorsinnaanermut piareersaatinik naalakkersuinikkut sulialinnut, innuttaasut peqatigalugit suliaqarnissaq saneqqunneqarsinnaanngilaq.

- Taamaattumik nunaqarferujussuup Kullorsuup illoqarfinngoriartuaanissaanut aqqutissiuussinissaq sulissutigissavara.

- Nunaqarfiup illoqarfinngortinneqarnissaanut piffissaq suli ungasisinnaavoq, taamaakkaluartoq piareersaatit maannakkut aallartinneqartariaqarput, tassungalu tunngatillugu misissuinerit maannakkut aallartittariaqarput, taanna oqarpoq.

Timotheus Petersen Kullorsuarmi aalisartut piniartullu peqatigiiffiani siulittaasuuvoq, kiisalu Arctic Fish Greenland A/S-p siulersuisuini ilaasortaalluni, taamaattumillu Kullorsuarmi nutaamik aalisakkeriviliortoqarnissaa pillugu suliniutit qanimut suleqataaffigigini, taassuma oqaatigaa.

Kullorsuarmi inuussutissarsiorneq suli annerusumik inerisaaffigineqassappat nutaamik annertuumillu tunisassiorsinnaasumik, minnerunngitsumillu amerlanerusunik sulisoqarsinnaasumik aalisakkeriviliortoqartariaqartoq, Arctic Fish Greenland ApS-ip pisortaata Frederik Olsenip siusinnerusukkut oqaatiginikuuaa.