Toqusup kinaassusaa politiit saqqummiuppaat, takunnissimasunillu ujartueqqipput
Angut 20-nik ukiulik blok 5-imi toqungasoq siumorneqarsimasoq pillugu innuttaasut paasissutissaatillit politiinut sianillaquneqarput.
Angut toqungasoq siumorneqarmat politiit blok 5-imi H. J. Rinksvejimi.
Assiliisoq: Leiff Josefsen
Allaaserisami angutip 20-nik ukiullip aqqa allassimasimagaluarpoq. Angutilli toqungasup siumorneqarsimasup aqqa allaaserisamit maanna peerneqarsimalerpoq.
20-nik ukiulik blok 5-imi toqungasoq siumorneqarsimasoq Kalaallit Nunaanni Politiinit kinaassusersineqarpoq.
Politiit takunnissimasunik ujartueqqipput:
- Toqusimasup pingasunngorneq 2. oktoberimit tallimanngorneq 4. oktoberip tungaanut susimaneranik paasissutissaateqaruit, imaluunniit toqusimasoq pillugu ilisimasaqaruit misissuinermut pingaaruteqarsinnaasunik, politiit kajumissaarpaatsit vagtcentralimut sianeqqullutit.
- Piffissami tassani nakkutiginninnermi immiussanik suliamut pingaaruteqartunik peqaruit, politiit attavigissavatit, tusagassiuutinut nalunaarummi pingasunngornerup ullaap tungaani politiit allapput.
Piffissami tassani nakkutiginninnermi immiussanik suliamut pingaaruteqartunik peqartoqarpat, politiinut attavigineqassasut politiit nangillutik allapput.
- Immiussat pingaaruteqarnersut nalorniguit, immiussaq toqqussavat politiillu ilinnik attaveqarnissaannut imaluunniit immiussap nunguterneqarnissaanik nalunaaruteqarnissaasa tungaanut utaqqissaatit,
Innuttaasut vagtcentralimut sianersinnaapput uunga normumut 701448.
Maannamut angutit marluk 25-nik 41-nillu ukiullit politiinit tigummigallarneqarput, taakkulu toqutsinermut unnerluunneqarput.
