Toqutsineq pillugu ukiuni qulingiluani pineqaatissinneqarsimasunut inissiisarfimmiittussanngortitsiniartut
Aasianni toqutsisoqarneranut atatillugu unnerluussisussaatitaasup ukiuni qulingiluani pineqaatissinneqarsimasunut inissiisarfimmiittussanngortinnissaa piumasaraa.
Toqqorsivimmit assilisaq: Leiff Josefsen
Sapaatip-akunnerani matumani Qaasuitsup Eqqartuussiviani suliarujussuaq suliarineqassaaq.
Angut toqutsisimasutut ilaquttaminillu pinngitsaaliisimasutut unnerluutigineqarpoq. Tamanna unnerluussummi Sermitsiap pissarsiarisimasaani atuarneqarsinnaavoq.
Ukioq ataaseq sinnilaarlugu matuma siorna juulip 16-ianni unnuap qeqqa qaangilaaraa toqutsineq Aasianni pivoq. Angutip unnerluutigineqartup angut 22-nik ukiulik quttoraatigut savimmik kapivaa.
Unnerluutiginnissummi allassimavoq savimmik kapisinermi uppataata taqarsua tamakkingajallugu kipineqartoq, 22-nillu ukiullip aaverneranik toquneranillu tamatuma kinguneralugu.
Aamma unnerluutigineqartoq toqutsinermut atatillugu toqutaasumut sioorasaarisutut unnerluutigineqarpoq.
Toqutsisimasutut sioorasaarisimasutullu unnerluutigineqarnermi saniatigut aamma pinngitsaaliilluni arnerisimasutut unnerluutigineqarpoq. Unnerluutiginnissut naapertorlugu unnerluutigineqartoq ilaquttaminut nakuusersimasutut, sioorasaarisimasutut pinngitsaaliisimasutullu unnerluutigineqarpoq.
Angut aamma 14-inik ukiulimmik pinngitsaaliisimasutut unnerluutigineqarpoq.
Arlalinnik taarsiiviginninnissamik piumasaqartoqarpoq, unnerluussisullu ukiuni qulingiluani pineqaatissinneqarsimasunut inissiisarfimmiittussanngortinnissaa piumasaraat.
Sisamanngorpat eqqartuussinerup naammassineqarnissaa naatsorsuutigineqarpoq.
