Troels Lund Poulsen Kalaallit Nunaannut tikeraassaaq illersornissamut isumaqatigiissut pillugu oqaloqatiginnikkiartorluni
Marlunngornermi Troels Lund Poulsen (V) nunatsinni nunanut allanut tunngasunut Naalakkersuisoq Vivian Motzfeldt (S naapissavaa.
Illersornissamut ministeri Troels Lund Poulsen (V) marlunngornermi Kalaallit Nunaannut tikeraassaaq nunanut allanut tunngasunut Naalakkersuisumik Nuummi naapitsiniarluni.
Arkivfoto: Leiff Josefsen
Illersornissamut ministeri Troels Lund Poulsen (V) marlunngornermi Nuummut aallassaaq Kalaallit Nunaanni nunanut allanut tunngasunut ministerimik, Vivian Motzfeldtimik, ataatsimeeqateqariatorluni.
Illersornissamut ministereqarfik tusagassiorfinnut nalunaarummi allappoq.
Taakku ilaatigut oqaluuserissavaat, 2021-imiit illersornissamut isumaqatigiissut sumut killiffeqarnersoq, taanna "Issittumi piginnaasat ataatsimoorussat"-nik taaguuteqartoq.
Isumaqatigiissummi 1,5 milliardit koruunit immikkoortinneqarput ilaatigut Issittumi dronit ungasissumut ingerlasinnaasut aamma radareqarfiit isumaqatigiissutaallutik.
Taamaakkaluartoq 2025-imi aallartinnerani - isumaqatigiissut ukiut sisamat qaangiunneranni - immikkoortut arlallit suli piviusunngunngillat. Tamanna DR aamma Weekendavisen allaaserineqarnikuuvoq.
Troels Lund Poulsenip nassuerutigaa, "naalakkersuinikkut allanngorarnerit ingerlaneranni annikippallaartumik iliuuseqartoqarsimasoq".
Isumaqatigiissut immikkoortunik arlalinnik imaqarpoq, taakkulu Illersornissaqarfiup piginnaasaanik nukittorsaaqataassapput sakkutooqarnikkut nakkutiginninnermut aamma innuttaasunut ikiuinissamut, soorlu annaassiniarnernut.
Isumaqatigiissut pinngortinneqarpoq, Issittumi pingaarutilimmik nunarsuarmi pissaanilissuarnut USA, Kina aamma Rusland akornanni isumannaallisaanermut illersornissamullu politikkikkut unammillernermi nunarsuup immikkoortuatut pingaarutilittut inissisimalersimammat.
Issittumi nunarsuarmioqatigiinnit soqutiginninnerup qaffakkiartornera pissutigalugu, 2021-imi isumaqatigiissut pilersinneqartoq partiit isumaqarput, sumiiffimmi pisut malinnaaffiginissaannut pisariaqartitsinerup qaffakkiartornera ilutigalugu.
Pingasunngornermi ministerip angalanera ingerlaqqissaaq Station Nordimut, Kalaallit Nunaanni mittarfeqarfinnut avannarlersaalluni inuttaqartumut. Taanna Sirius-patruljep atortarpaat.
Angalanerup immikkoortuani tassani Kunngi Frederik peqatigalugu pissaaq.
Sirius-patrulje nakkutiginninnernik ingerlatsisarpoq aammalu Kalaallit Nunaata avannarpasissuani inoqajuitsumi politiit oqartussaaffiinik isumaginnittarluni.
Kalaallit Nunaannut tikeraarneq pissaaq qaammatit arlallit Kalaallit Nunaat pillugu aammalu Amerikap præsidentiata, Donald Trumpip, Kalaallit Nunaannik aqutsinissamik soqutiginninneranut atatillugu eqqissiviilliornerup kingorna.
Sisamanngornermi Amerikap præsidentiata, Donald Trumpip, kingumut oqaatigaa Kalaallit Nunaat nunarsuarmi isumannaallisaanermut pingaaruteqartoq.
