Trump: Canadap, Mexicop aamma Kinap pillaammik akitsuusersuiffigineqarnissartik avaqqussinnaajunnaarpaat
Amerikami præsidentip ilimasaarutigaa, akitsuusersuineq nunanut arlalinnut atuutilissasoq, taakkulu tamanna pinngitsoorsinnaanngikkaat.
USA-p præsidentia, Donald Trump, akitsuutit qaavisigut akitsuusersuisoqassasoq mianersoqqusivoq. Taassuma tallimanngornermi tusagassiorfiit Det Hvide Husemut aggersarpai, asserlu una tassanngaaneersuuvoq.
Assiliisoq: Mandel Ngan/Ritzau Scanpix
USA-p præsidentia, Donald Trump, oqarpoq, Canada, Mexico Kina-lu iliuuseqarsinnaanngitsut akitsuusiinissamut pinngitsoortitsiniarlutik, akitsuusersuinissallu arfininngornermi atuutilissasut naatsorsuutigineqarpoq.
Nutaarsiassaqartitsivik Reuters naapertorlugu Præsidentip tamanna tusagassiortunut oqaatigaa danskit nalunaaqutaat naapertorlugu tallimanngornermi unnukkut.
Trump aamma oqarpoq, uuliamut gassimullu akitsuusersuineq 18. februaarimi atuutilissasoq ilimanartoq.
Akitsuusersuinerit atuutilersinneqarnissaannut atatillugu paasissutissat sukumiinerusut kiisalu nioqqutissat suut pineqarnersut suli ersarissaanngillat.
Illorsuup Qaqortup tusagassiutinut oqaaseqartartua, Karoline Leavitt, tallimanngornermi siusinnerusukkut akitsuusiinissamik ilimasaarineq pillugu oqaaseqarpoq.
- Februaarip aallaqqaata killigititsilluni, præsident Trumpip sapaatip akunnerini arlallit matuma siorna ilimasaarutigisaa ingerlaannassaaq, taanna oqarpoq.
- Præsidenti Mexico-mut 25 procentimik akitsuusiissaaq, Canada-mut 25 procentimik akitsuusiissaaq Kina-mullu 10 procentimik akitsuusiissaaq, taanna tallimanngornermi siusinnerusukkut oqarpoq.
Trumpip nunat arlallit arlalitsigut isornartorsiorpai.
Siusinnerusukkut taassuma piumasaraa fentanylip (anniarunnaarsaatip sakkortuup, aaqq.) USA-mut eqqunneqartarnerata unitsinneqarnissaanut nunat pineqartut iliuuseqassasut. Fentanyl anniarunnaarsaatitut nakorsaatitut atorneqartartoq sakortoorujussuuvoq ukiullu tamaasa USA-mi inuit tusintilikkaat toqqutigisarpaat.
Taamatuttaaq aamma Mexicomiit USA-mut nunap killeqarfii qaangerlugit iserniartoqartarnerata akiorneqarnissaa pillugu ilungersunartuunerarlugu oqariartuuteqartarpoq.
Præsidentip tallimanngornermi nassuerutigaa akitsuutit qaffasinnerusut ilaatigut atuisartut akiliinerunerannik nassataqarsinnaasartoq.
Taamaakkaluartoq aningaasaqarnikkut niuernermik ingerlatsisut pilersaarumminut qisuariaatissaat taassuma ernumaginngilaa, pillaalluni akitsuusersuineq arfininngornermi aallartinneqassasoq ilimasaaruteqareerpoq.
Donald Trumpip aamma tallimanngornermi naqissuserpaa, "soorunami"nioqqutissat EU-meersut aamma akitsuusersorneqaqqissasut.
Trumpip siusinnerusukkut EU akitsuummik eqqussinissamik sioorasaarpaa oqarluni nunat EU-mi ilaasortat USA-mut "aarlerinartumik" niuernerminni sinneqartoortartut.
- EU-mut akitsuusersuissamaarnersunga? Eqqortumik akissutisinissarpisi imaluunniit politikerisut akissutisinissarpisi?, tusagassiortut Illorsuarmi Qaqortumi najuuttut aperivai.
- Soorunami. Europami Naalagaaffiit Peqatigiiffiannit ajorluinnartumik pissusilersorfigivaatigut, taanna oqarpoq.
Nutaarsiassaqartitsivimmit AFP-mit oqaatigineqarpoq Trumpip tallimanngornermi aamma oqaatigigaa, microchipsit aamma saviminissat nioqqutigineqarneri matumani eqqugaasinnaasut.
