Trump: Iranip qullersaa toqunnianngilarput - massakkoqqissaaq

USA-p præsidentia, Donald Trump, oqarpoq, nunap pilersaarutiginngikkaa Iranip qullersaata, ayatollah Ali Khamenei-ip, toqunnissaa - "massakkumuugallartoq".

Truth Socialimi attaveqaqatigiiffimmini Trump allappoq .

- Nalunngilluinnarparput sumerpiaq taanna "qullersatut taagorneqartoq" toqqoqqanersoq. Pisariitsumik pisarineqarsinnaavoq, taamaattorli massakkut issimaffimmini isumannaatsumiippoq, Trump nangilluni allappoq.

Taamatuttaaq USA-p præsidentia erseqqissaavoq, inunnik imaluunniit USA-p sakkutuuinik missilinik saassussisoqarnissaa kissaatiginngikkini, kisianni USA-p utaqqisinnaassuseqarnera qaangerneqaqqajaasoq.

- Piumasaqaatitaqanngitsumik tunniutiinnarneq, allakkamini allami aamma allappoq.

X-mi allakkami allami aamma ullumikkut, USA-p vicepræsidentia, J.D. Vance, allappoq Trump "maluginiagassaasumik tunuarsimaartoq".

- Taanna aalajangersinnaavoq, Iranip (uranimik, aaqq.) peqqumaasersornerata unitsinnissaanut allamik iliuuseqarnissaminik, Vance allappoq nangillunilu:

- Soorunami inuit toqqissisimannginnissaminnut pisinnaatitaaffeqarput nunani allani pisunut akuliussinnaanissaq pillugu, tassami ukiuni 25-ini nunanut allanut politikki  isumatusaarnertaqanngitsup kingunerisaanik.

Kangia qiterlermi pissutsit pissutigalugit Trumpip ataasinngornermi G7-mi naalagaaffiit siuttuisa ataatsimiinneranni Canadami pisumi pilersaarutaasumit siusinnerusukkut qimaguppoq.

Taamak Illorsuaq Qaqortumit nalunaaruteqartoqarpoq  marlunngornerup unnuaani danskit nalunaaqutaat malillugu.

- Angusat arlalissuupput, kisianni Kangia Qiterlermi pisunut tunngasut pissutigalugit Trumpip ataatsimiinneq unnukkut naalagaaffiit siulittaasuisa nereqatigeereerneranni qimappaa, Illorsuup Qaqortup avammut oqaaseqartartua, Karoline Leavitt, X-imi allakkamini nalunaarpoq.

USA Israelimut aalajaalluni tapersersuisutut ilisimaneqarpoq , aamma USA-p præsidentia, Donald Trump, uppernarsaareerpoq, USA-mut ilisimatitsisoqarsimasoq, Israelip tallimanngornerup unnuaani Iranimut saassussinerata annertuup aallartinnginnerani.

Israelip oqaatigaa saassussinerup ilaatigut siunertarigaa atomi pillugu pilersaarummut atatillugu Iranip atortui immikkut ittut ajoquserniarlugit.

Tassanngaanniit Iran aamma Israel silaannakkut imminnut saassuttaqattaalerput, marlunngornermilu saassussineq ullut tallimassaannik suli ingerlavoq.