Trump Kalaallit Nunaat pillugu: Danmarki isumaqataalerumaarpoq
USA-p præsidentiata Donald Trumpip White Housemi ivertinneqanermi kinguninngua Kalaallit Nunaat pillugu aperineqarpoq. Danmark "isumaqataalerumaartoq" oqaatigaa.
Donald Trump præsidentinngortinneqarnermi kinguninngua allaffimmini tumaasami (Det Ovale Værelse aaqq.) aalajangersakkat atsiorpai.
Assiliisoq: Carlos Barria/Reuters/Ritzau Scanpix
Donald Trumpip ataasinngornermi ualikkut præsidentitut ivertinneqarnermi oqalugiarnermini Kalaallit Nunaat eqqaassaneraa pissangalluni utaqqineqarpoq. Eqqaanngilaa.
Præsidentip siusinnerusukkut eqqaasariikkani Panamap kanalianik tiguaaniarnini eqqaavaa, Kalaallit Nunaannulli tunngatillugu oqaaseqanngilaq. USA-lli oqartussaaffii amerlissasut oqaatigaa.
Donald Trump White Housemi ataasinngornermi kingusinnerusukkut allaffimmi tumaasami Kalaallit Nunaat pillugu aperineqarami Danmarki “isumaqataalerumaartoq” oqarpoq:
- Kalaallit Nunaat nuannersuuvoq, nunarsuarmilu isumannaatsuunissaq qulakkeerniarlugu pisariaqartipparput.
- Danmarki isumaqataalerumaartoq qularinngilara, Trump tusagassiortumit tamanna pillugu aperineqarami oqarpoq.
Præsidentip arlaleriarluni Kalaallit Nunaata aqulernissaa pigilernissaalu USA-mut pingaaruteqarluinnarnera oqaaitigisareeraalu taama aperineqarpoq.
- Innuttaasut Danmark nuannarinngilaat
Kalaallit Nunaat Danmarkimut aamma akisoorujussuusoq ataasinngornermi aamma oqaatigaa:
- Piginera pigiinnarneralu aningaasartuutigingaatsiarpaat, Trump oqarpoq.
Kalaallit Danmarki naammaginngikkaat ilanngullugu oqaatigaa:
- Nalunngisatsitut Kalaallit Nunaanni innuttaasut Danmark nuannarinngilaat, isumaqarpungali uagut nuannarigaatigut, Trump oqarpoq nangillunilu:
- Ernera aallartitallu sapaatip-akunneri marlussuit matuma siorna tikeraarput, nuannaraatigut. Qanoq pisoqassanersoq takussavarput, oqarpoq.
Kalaallit Nunaat nunarsuarmi isumannaallisaanermut pingaaruteqartoq, maannakkullu pissutsit naammaginanngitsut Donald Trumpip ilanngullugu erseqqissarpaa:
- Kalaallit Nunaat uagutsinnut pingaaruteqaannarani nunarsuarmi isumannaallisaanermut pingaaruteqarpoq. Russit kinamiullu umiarsui tamaaniipput, taamaaginnarsinnaanngillallu.
