Trump præsidentinngortussatut imminut nalunaarutigivoq

Republikanerit qinigassanngortitaata Donald Trumpip Floridami oqalugiarnermini USA-mi præsidentimut qinersinermi ajugaasimanerminik nalunaaruteqarpoq.

- Politikkikkut ajugaanerput nunatsinni aatsaat taama annertutigaaq.

- Tamanna amerikami innuttaasunut ajugaaneq nuannersuuvoq, Trump oqarpoq, USA-llu "ajunngitsunngorteqqinnissaanut" periarfissaqaqqilersimanerarluni.

Nulia, Melania Trump, qitornai aappaalu sanianiipput.

Vicepræsidentinngorniartoq J.D. Vance aamma Floridami oqaluttarfimmiippoq.

Senatimi aamma amerlanerussuteqartut

Trump naapertorlugu nuna tamakkerlugu qinigaatitaqarnerpaaginnanngilaq. Qinersisartunit aamma taaguunneqarneqarnerpaavoq. 

- Nunatta ajorunnaarsinneqarnissaa sulissutigissavarput.

- Killeqarfitsinnik nunattalu avatangiisiniittunik iluarsaassiumaarpugut.

- Unnuaq oqaluttuarisaanermiilerpugut, Donald Trump oqarpoq.

Aamma Senatimi Republikanerit amerlanerussuteqartut tikkuarpaa.

- USA-p aatsaat taama pissaaneqartigisumik oqartussaassuseqartippaatigut. Senatilu aqutsineq tiguaqqipparput, Trump oqarpoq.

- Aamma inatsisartut ataatsimiittarfianni ajugaasutut isikkoqarpugut.

Qinersineq sioqqullugu Demokraatit qinigassanngortittut attaviitsut sisamat tapersersortaanerisigut Senatimi amerlanerussuteqarput.

Floridami oqalugiarnerit

AP-p pingasunngornermi ullaakkut nalunaarutigaa Republikanerit Senatimi amerlanerussuteqarnissamut pisariaqartitaminnik 51-inik ilaasortaatitaqalersimasut.

Kalaallit Nunaata nalunaaqutaa malillugu tallimanut suli ilisimaneqanngilaq kina inatsisartut amerlanerussuteqarfianni amerlanerussuteqarnersoq.

USA-mi tv-qarfiup konservativiusup Fox News-ip Trump præsidentinngortutut nalunaarutigimmagu Trump Floridami tapersersortiminut oqalugiarpoq.

Nutaarsiassaqartitsivik AP qinersinermi paasissutissanik katersuiniaasarpoq, qinersinermilu kikkut ajugaanersut suli nalunaarutiginngilaa.

Vance: Uteqqinneq annertunerpaaq

J.D. Vance sivikitsumik oqalugiarpoq, tassanilu Donald Trumpip ajugaanera „Amerikap oqaluttuarisaanerani uteqqinnertut annerpaatut“ taavaa.

- Politikkikkut annertunerpaamik uteqqereerutta aningaasaqarnikkut sakkortunerpaamik uteqqissaagut, J.D. Vance oqarpoq.

AP-p Donald Trump Pennsylvaniami, Georgiami North Carolinamilu ajugaasunngornerarpaa.

Aammattaaq Edison Researchip ilimagisaa naapertorlugu aamma Nevadami Wisconsinimilu ajugaassaaq.

/ritzau/