Trump-Putin oqarasuaatikkut nalunaaquttap-akunnerata affaa sinnerlugu oqaloqatigiinneq naammassivoq
USA-p præsidentiata, Donald Trumpip, Ruslandillu præsidentiata Putinip oqarasuaatikkut oqaloqatigiinnerat naammassivoq, Kremlinip Tass naapertorlugu nalunaarutigaa.
Putin aamma Trump akornanni oqaloqatigiinneq Det Hvide Hus naapertorlugu ajunngitsumik ingerlasimavoq. (Assit toqqorsivimmit).
Assiliisut: Elijah Nouvelage, Alexander Neme/Ritzau Scanpix
Oqarasuaatikkut oqaloqatigiinneq Ruslandip præsidentiata, Vladimir Putinip, USA-llu præsidentiata, Donald Trumpip, akornanni naammassivoq.
Kremlinip tamanna nalunaarutigaa nalunaaqutaq danskit nalunaaqutaat 17.30 qaangilaarnerani Nutaarsiassaqartitsivik Tass naapertorlugu.
NBC News aamma allappoq Det Hvide Hus-imi pisortaq innersuussutigalugu, oqaloqatigiinneq naammassineqartoq. Oqaloqatigiinneq sivisunerusoq nal. ak. aappaata affaa sinnerlugu, NBC News allappoq.
Oqaloqatigiinnerup imarisaanut paasissutissat erseqqissumik nalunaarutigineqanngillat, kisianni pinerata nalaani nutarterisoqarpoq ilaatigut Det Hvide Hus-imit.
- Maanna pisut - præsident Trump Oval Office-miippoq Ruslandip præsidentia, Vladimir Putin, oqaloqatigalugu nalunaaqutaq 10 EDT (15 dansk nalunaaqutaat naapertorlugu, aaqq.) aallarnerfigalugu, Det Hvide Hus-imi atorfilittanut tullersorti Dan Scavino attaveqaqatigiittarfimmi X-imi nal. ak. ataatsip missaani oqaloqatigiinneq aallartimmat allappoq.
- Oqaloqatigiinneq ajunngitsumik ingerlasoq suli ingerlaartoq, allappoq nangillunilu.
Nal. ak. affa missaani kingorna allappoq oqaloqatigiinneq suli ajunngitsumik ingerlasoq.
USA-p siusinnerusukkut ataatsimiinnermi Ukrainemiut qullersaqarfiannut siunnersuutigaa Ruslandimut sorsunnermi ulluni 30-ni sakkuaanneq unitsinneqarallassasoq.
Ukrainemit oqaatigineqarpoq amerikamiut siunnersuutaat tapersersorneqartoq, Putinili oqarpoq eqqissisimatitsigallarnissamut isumaqataalluni, kisianni aamma aalajangersimasunik piumasaqaateqarluni.
Trump naapertorlugu marlunngornermi ilaatigut "nuna" aamma Ukrainemi nukissiorfiit oqaluuserineqartussaapput.
Katillugit amerikamiut naalakkersuisuisa neriuutigaat Rusland persuarsiorfigisinnaassallugu sakkuaallisaaneq akuersissutigissagaa - kingusinnerusukkullu aamma eqqissinissamut pilersaarusiorneq sivisunerusoq.
Trumpip arlaleriaqaluni oqaatigaa eqqisseqatigiittoqarnissaa sulissutiginiarlugu.
Novembarimi 2024-mi præsidentimut qinersinissaq sioqqullugu taassuma allaat oqaatiginikuuaa Ukrainemi sorsunneq nalunaaquttap akunnerisa 24-it ingerlaneranni unitsissinnaallugu. Kingornali taassuma oqaatigaa tamanna quiasaarutigalugu oqaatigisimallugu.
Oqaloqatigiinneq nunarsuarmi tamarmi malinnaaffigineqarluarpoq.
Februaarimi amerikamiut præsidentiat aamma ruslandimi præsidentiat oqarasuaatikkut aamma oqaloqatigiinnikuupput, taamani nal. akunnerata affaa missiliorlugu oqaloqatigiikkamik.
/ritzau/
