Trump: Tikeraarneq kamassaarinerunngilaq - qaaqquneqarpugut
Donald Trumpip USA-mit tikeraartoqarnissaa sapaatip-akunnerani matumani kingusinnerusukkut pisussaq peqqusaarnerunera ataasinngornermi apersorneqarnermini ilumuunnginnerarpaa. - Qaaqquneqarpugut, Trump oqarpoq. Tamatuma saniatigut Namminersorlutik Oqartussat ataasinngornermi kingusissukkut kikkunnulluunniit qaaqqusisoqarsimanngitsoq nalunaarutigaat - inunnut pisortatigoortumilluunniit, aamma naalakkersuisooqatigiinnissamik isumaqatigiinniarnerit ingerlanneqartut ataqqineqaqqullugit nunanut allanut kaammattuutigineqarluni.
- Sianerfigaatigut. Uagut sianerfiginngilagut, aamma qaaqquneqarpugut, Donald Trump ataasinngornermi apersorneqarnermini oqarpoq.
Foto: Brendan Smialowski/AFP/Ritzau Scanpix
USA-p naalakkersuisuini qaffasissumik atorfillit sapaatip-akunnerani matumani Kalaallit Nunaannut tikeraassapput. Amerikamiut namminneq inuttut tikeraassallutik oqaatigaat, ilaatigut Sisimiuni qimussimik sukkaniunneq isiginnaariarniarlugit.
Tikeraarnissaq USA-mit kamassaarinertut taaneqarnera USA-p præsidentiata Donald Trumpip ataasinngormat ilumuunnginnerarpaa, naak aallartitat Naalakkersuisunik nutaanik suli pilersitsisoqanngitsoq tikittuussaagaluartut. Aamma præsidentip Kalaallit Nunaannik oqartussaaffiginnikkusullunilu piginnittuulerusunneranut oqariartuutigisartagaanut kalaallit politikerii arlaleriarlutik erseqqissumik akerliliisaraluartut.
Trumpili oqarpoq Amerikamiut qaaqquneqarsimasut:
- Kamassaarinerunngilaq. Inussiarnisaarneruvoq, kamaassaarinerunngilaq.
- Kalaallit Nunaanni inuppassuit iluamik illersorneqarusullutillu isumassorneqarnissamik kissaateqartut oqaloqatigisarpavut.
- Sianerfigaativut. Uagut sianerfiginngilavut, aamma qaaqquneqarpugut, Trump ataasinngornermi oqarpoq.
Namminersorlutik Oqartussat qaaqqusisimanatik nalunaarutigaat
Kina qaaqqusisuunersoq Trumpip eqqaanngilaa. Naalakkersuisulli qaaqqusisuunngillat. Namminersorlutik Oqartussat Facebookikkut tuluttut ataasinngornermi unnukkut nalunaaruteqarput, ilaatigut ima allallutik:
- Naalakkersuisut, Kalaallit Nunaata naalakkersuisui, inunnut pisortatigoortumilluunniit tikeraartoqarnissaanik qaaqqusisimanngisaannarput.
- Naalakkersuisut maanna atuuttut naalakkersuisuugallarput, nutaamik naalakkersuisoqatigiinnik pilersitsisoqarnissaa utaqqivaat, nunanullu allanut tamanut tamanna ataqqineqassasoq qinnutigaarput, Naalakkersuisut allapput.
KNQK-p, Sisimiuni qimussimik sukkanniunnissamik aaqqissuussisup, Amerikamiut – ilaatigut præsidentip tulliata J.D. Vancep nulia – qaaqqusimanagit siusinnerusukkut aamma nalunaarutigaat.
- KNQK USA-p præsidentiata tulliata nulia Kalaallit Nunaannut Sisimiunullu angalaneranut attuumassuteqanngilaq. Qaaqqunikuunngilarput, peqatigiiffik Facebookimi quppernermini allappoq.
Amerikamiut tikeraarnissaat innuttaasorpassuarni toqqissisimanngilersitsivoq. Tikeraarnissamilli qilanaartut ilaat tassaavoq Trumpimik nuannaartorinnittoq Jørgen Boassen.
Qimussimik sukkaniuttarnerup aningaasatigut ajornartorsiortup USA-mit tapersersorneqarnissaa qanoq sulissutigisimanerlugu DR.dk-mut oqaluttuaraa.
Amerikamiut aningaasaatitik qanoq atorneqarnersut takussallugit tikeraartutut takornariatullu tikinnissaat pissusissamisoortoq Boassen DR-imut oqarpoq.
Trump: Usha Vancep Kalaallit Nunaat pillugu isumassarsiaq nuannaaraa
USA-mit aallartitat ilaat tassaapput Usha Vance, præsidentip tulliata J.D. Vancep nulia, nunap sillimaniarneq pillugu siunnersorti Mike Waltz aamma nukissiornermut ministeri Chris Wright.
Tamanna pillugu Trump ataasinngornermi ima oqarpoq:
- Præsidentip tulliata nulia ataqqilluinnarpara. Arnaavoq silassorissoq inussiarneqisorlu. Kalaallit Nunaat pillugu isumassarsiaq nuannaraa.
- Taamaammat aallalerpoq, aamma Marco (Rubio, aaqq.) allallu aamma taavunnalerput, Trump oqarpoq. Nalunaarutigineqanngilarli nunanut allanut ministeri Marco Rubio sapaatip-akunnerani matumani tikeraartunut ilaassanersoq, Trumpillu oqaaseqaatini itisilinngilaa.
Trumpilli uteqqippaa USA Kalaallit Nunaannut qaaqqusaasoq:
- Qaaqquneqarpugut, isumassarsiarlu nuannaraat, taakkumi nalugunanngisarsitut sumiginnarneqarnikuupput. Iluamik isumagineqarnikuunngillat.
- Taamatut ingerlaannartoqarsinnaanngilaq
Trumpip USA-p Kalaallit Nunaannik akisussaaffeqalernissaanik kissaateqarnini apersorneqarnermini aamma uteqqippaa:
-Kalaallit Nunaat siunissami uagutsinnut immaqa ilaalersinnaasoq isumaqarpunga.
- Isumaqarpunga tamanna pingaaruteqartoq. Nunarsuarmi isumannaallisaanermut tunngatillugu. Umiarsuit Kalaallit Nunaanniittut qiviaraanni taakkuupput Ruslandimeersut, Kinameersut aamma inuppassuit sumiiffinni assigiinngitsuniipput.
- Taamatut ingerlaannartoqarsinnaanngilaq. Taamatut ingerlaannartoqassanngilaq. Ajorpoq.
- Tikeraalerput, inussiarnisaarneruvoq.
