Trumpip akitsuusersuinera Kalaallit Nunaannut annikitsuinnarmik eqquissaaq
Kalaallit Nunaata USA-mut avammut tunisisarnera annikitsuararsuuvoq, taamaattumillu akitsuutit "annertunngitsumik" sunniuteqassapput, pisortaq oqarpoq.
Sulisitsisuni pisortap Christian Keldsenip Amerikamiut akitsuutaat ernumaginngilai.
Assi: Leiff Josefsen
USA-p akitsuusersuinerata kingorna danskit aktiaataat nalikillingaatsiartut Kalaallit Nunaanni pissutsit allaanerupput.
Nunatta USA-mut avammut niuernera annertunngilaq, 2024-milu millioninik marlunnik kisitsisitalinnik nioqquteqarpoq.
Sulisitsisut peqatigiiffianni, suliffeqarfiit 350-it katillugit 7000-inik sulisulinnik ilaasortaaffigisaanni, pisortap Christian Keldsenip nassuiarpaa.
- USA-mut attaveqarnitta killeqarnera pissutigalugu sunniuteqarsinnaanera annertunngilaq.
- Pissutsit suliffippassuarnik annaasaqarfiusussat atunngilavut, Christian Keldsen oqarpoq, taakku akitsuutit Kalaallit Nunaannut qanoq sunniuteqassanersut suli qulaajaaffigaat.
Kalaallit Nunaat EU-mut ilaasortaanngilaq, taamaattuk Danmarkip akitsuutinik 20 procentimik eqqugaaneratut eqqugaajunnarani.
Aamma Norgep qeqertai Sikuiuitsup kujalliup qanitaaniittut, inoqanngitsut Svalbard aamma Heard- McDonald, USA-p præsidentiata Donald Trumpip nunat akitsuummik eqqugaasussatut allattorsimaffianni allassimagaluartut Kalaallit Nunaat allassimanngilaq.
Taamaattumik Kalaallit Nunaat akitsuummik nalinginnaasumik 10 procentimik arfininngorpat atuutilersussamik eqqugaanissaa ilimanarpoq.
Aalisakkat avammut tunisassiornermi USA initunngilaq
Aalisakkanik tunisassiorneq avammut tunisani annertunerpaavoq. Nunatsinnit avammut tunisat 90 procentii aalisarnermut tunngassuteqarput.
Avammut tunisani USA taama initutiginngilaq.
Naatsorsueqqissaartarfiup kisitsisaataat naapertorlugit 2024-mi Danmark aqqutigalugu aalisakkat tunisassiat 3,5 milliardit koruunit missaanniittut avammut tunineqarsimapput. USA-mut tunineqartut 38,8 millionit koruuniullutik.
Kinamut 1,7 milliardit koruunit missaannik nalilinnik EU-mullu 1,1 milliardit koruunit missaannik nalilinnik avammut tunisisoqarsimavoq.
- USA uagutsinnit annertuumik niuerfiunngilaq, nunarsuarmimi niuerfinni allani akimik pitsaanerusumik tunisisoqarsinnaammat, Christian Keldsen oqarpoq.
Kalaallit Nunaannit USA-mut toqqaannartumik avammut aamma niuertoqarneq ajorpoq.
2024-mi Naatsorsueqqissaartarfiup paasissutissaataani takuneqarsinnaavoq USA-mut toqqaannartumik avammut niuertoqarsimanngitsoq, akerlianilli 56,6 millionit koruunit nalingannik eqqussisoqarsimalluni.
