Trumpip aqqartartunik atomitortunik inissiiniarnerata kingorna Kreml annertuuliortoqannginneraavoq

Atomip nukinganut tunngatillugu illuatungeriit tamarmik oqaatsinik mianersortumik atuisariaqarput atomi pillugu oqaaseqarniarunik, kisianni massakkut atomimik atuisinnaanermik sakkortuuliortoqanngilaq.

Taama oqarpoq Ruslandip naalagaaffiata oqaaseqartartua Dmitrij Peskov tusagassiortunik katersortitsinermi, Ruslandip naalagaaffiata nutaarsiassaqartitsivia Tass allappoq.

- Isumaqarpugut massakkut sakkortuuliortoqanngitsoq. Paasinarpoq ajornartorsiutit pisariusorujussuit, mianernartut oqaluuserineqartut, tamakkulu amerlasuutigut misigissutsinut attuumassuteqartorujussuusut, Peskov oqarpoq.

Oqaaseqaat tamanna pivoq, USA-p præsidentia, Donald Trump, tallimanngornermi oqarmat, amerikamiut aqqartartui atomimik ingerlatillit sumiiffinnut "tulluartunut inissinneqassasut".

Taamatut pisoqarneranut pissutaatinneqarpoq Ruslandimi siornatigut præsidentiusimasup Dmitrij Medvedevip oqaaseqaatai malillugit. Taamaattorli oqaatsit Trumpip innersuussutigisai saqqummiunneqanngillat.

Medvedev arlaleriarluni Ruslandip Ukrainemi sorsunnerani sioorasaarisarnermigut navianartorsiortitsisarsimavoq - tassunga ilanngullugit nunarsuarmi sorsunnerit pingajuat aamma Ruslandip sakkussiaatai atomip nukinganik qaartartortallit eqqaasarlugit.

Dmitrij Peskov kaammattuivoq pineqartup mianersuunneqarnissaa pillugu.

- Soorunami isumaqarpugut sakkussiat atomillit pillugit oqalunnerit mianersortumik pineqartariaqartut, Dmitrij Peskov oqarpoq.

Trumpip oqaatigiumanngilaa, aqqartartut atomimik ingerlatillit imaluunniit sakkussiat atomitallit  "tulluartumik inissinneqartussat" pillugit sunarpiaq pineqarnersoq.

Taamatuttaaq taanna nassuiaateqanngilaq, sumut aqqartartut inissinneqassanersut. Inissisimaffii isertuunneqarput amerikamiut illersornissaqarfianit.

Juli naajartornerani Medvedev, Ruslandip isumannaallisaanermut siunnersuisoqatigiivisa tullersortaat, allappoq attaveqaqatigiittarfik X-ikkut, Trumpip Ruslandimik "killissarsiorluni immeraattoq".

Taamak taanna qisuariarpoq Trumpip Ruslandimut akitsuusiinissamut aarlerisaarutai tunngavigalugit.

- Killissarsiornerit nutaat takkukkaangata, tamanna aarlerisaarutaavoq sorsunnersuarmut alloriarnissamut. Ruslandip Ukrainellu akornanni pinnani, kisianni nammineq nunaminut, Medvedev allappoq.

Medvedevip piffissami ataatsimi Ruslandimi præsidentitut inissisimavoq 2008-miit 2012-mut.

Taanna nalilerneqarpoq Vladimir Putinip sinniisorisimagaa, taamaalilluni Putinip præsidentitut piffissap sivisussusaanut inatsisitigut killilersuinerit qaangerlugit naalakkersuinermi piginnaaneqarniassammat.

Taamanikkut piffissami Putin ministeriunertut inissisimavoq.