KL

DK

INATSISISSATUT SIUNNERSUUT PIAARNERPAAMIK SULIARINEQARTOQ

Trumpip soqutiginninnerata kingorna: Kinaassutsiminnik isertuussisut nunanillu allaneersut partiinut tapiissuteqarsinnaanerat inerteqqutaalissaaq

Inatsisissatut siunnersuut nutaaq marlunngornermi piaartumik oqaluuserineqassaaq. Politikkikkut suliniutinut inuit namminneq tunissuteqarsinnaanerannut malittarisassat sukaterneqarnissaat, kinaassutsimillu isertuussisut nunanillu allaneersut tunissuteqarsinnaanerisa inerteqqutaalernissaat siunnersuutip siunertaraa.

Thomas Munk Veirum
Tusagassiortoq
Saqqummersinneqarpoq

Inatsisartut ataasinngornermi ataatsimiillutik aallarteqqipput, ataatsimiinnerullu ammarneqarnerani siulittaasup Mimi Karlsenip (IA) nutaarsiassaq annertooq saqqummiuppaa.

Inatsisartunut qinersinerup avataaniit akuleruffigineqarnissaa illersorniarlugu Inatsisissatut siunnersuut siunertaqarpoq, taannalu marlunngornermi tuaviortumik oqaluuserineqassaaq.

Siunnersuutip kinaassutsimik isertuussisumik nunanillu allaneersunit politikkikkut sulinermut tapiissutinik tigusineq inerteqqutinngortissavaa. Siunnersuut Inatsisartut siulittaasuannit saqqummiunneqarpoq, allassimavorli Naalakkersuisut saaffiginninnerisa kingorna siunnersuutigineqartoq.

Siunnersuummut oqaaseqaammi ima allassimavoq:

- Naalakkersuisut Inatsisartut Siulittaasoqarfiannut saaffiginnissuteqarlutik siulittaasoqarfimmut isumaliutigeqquaat ataatsimiinnermi ingerlasumi suliarineqartussamik inatsisissatut siunnersuummik saqqummiussaqartoqaqqullugu, taamaaliornikkut - Kalaallit Nunaata naalakkersuinikkut innarlitsaaliorneqarnerata illersorneqarnissaa siunertaralugu – ingerlaannartumik atuutilersumik naalakkersuinikkut suliaqarnermut inuit namminersortullu aningaasanik tapiissuteqartarnerannut malittarisassat sakkortusineqassallutik, kinaassutsimik isertuussilluni nunanillu allanit tapiissutinik pissarsinissamut nalinginnaasumik inerteqquteqarnikkut.

Inuusuttunut immikkoortortaqarfinnut aamma atuuttoq

Taamaattumik siunnersuut "Kalaallit Nunaata nunarsuarmi sumi inissisimanini tunngavigalugu naalakkersuinikkut soqutigineqarnera naalagaaffiullu pissaanilissuup iligisap sinniisaasa Kalaallit Nunaannik tigusillutillu nakkutilliilernissaminnik soqutigisaqarnerminnik ersersitsisimanerat eqqarsaatigalugu" eqqarsaatigalugit isiginiarneqartut aamma allassimavoq.

Taamaasilluni præsident Donald Trumpip Kalaallit Nunaata oqartussaaffigilernissaa USA-mut pingaaruteqarluinnartutut isiginerarlugu oqariartuuteqartarnera pineqarpoq.

Inatsisissatut siunnersuut tamakkiisumik suliarineqassaaq Inatsisartunilu marlunngornermi akuersissutigineqassalluni.

Siunnersuutip inatsisartut inatsisaat allanngortissavaa, taamaalilluni partiit nunanit allanit kinaassutsimillu isertuussisunik tapiissuteqartoqarsinnaanera akuerisinnaajunnaassavaat.

- Inerteqquteqarneq taamatuttaaq partiit najukkani inuusuttunullu immikkoortortaqarfiinut atuutissaaq. Inerteqqut aammattaaq Folketingimut Inatsisartunulluunniit ilaasortanut taakkulu sinniisussaannut, kiisalu inunnut Folketingimut Inatsisartunulluunniit qinersinissamut aggersumut qinigassanngortittunut atuutissaaq, nassuiaammi allassimavoq.

Aamma partiit inuinnaat tunissutaannik katillugit 200.000 koruunit sinnilinnik, imaluunniit ataasiakkaarlutik 20.000 koruunit sinnerlugit, tunissuteqarfigineqarsinnaanerat inerteqqutaalissaaq.

inuiaqatigiit samfund

ATORFIIT Se alle jobs

Powered by Labrador CMS