Tuluttut 7. klassini nuannarineqarluartoq: Nuna tamakkerlugu misilitsinnerni angusarissaarfiuvoq
7. klassini atuartitsineq ingerlalluartoq, atuarfiit ataatsimoorlutik Pitsaassuseq pillugu Nalunarutaanni kisitsisini takuneqarsinnaavoq. Alloriarfimmi misilitsinnerit nuna tamakkerlugu naammassisat eqqortut procentinngorlugit 84-upput. Tassani takuneqarsinnaalluni atuartut tuluttut ingerlalluartut.
Foto: Tôrtia Reimer-Johansen
7. klassimi atuartut aperigaanni atuarfimmi atuartitsissut sorleq nuannarinerpaaneraat, ima akinissaat ilimanaateqarluarpoq:
- Tuluttut.
Ukiumi atuarfiusumi 2022/2023 atuarfiit ataatsimoorlutik Pitsaassuseq pillugu Nalunaarusiaanni takuneqarsinnaavoq tuluttut atuartitsineq nuannarineqarluartoq.
Kommuneqarfik Sermersuumi 7. klassini atuartut tuluttut atuartitsinermi ingerlalluarlutik naammassisat eqqortut 92%-upput. Kommune Qeqertalik Qeqqata Kommunialu naligiillutik 86%-imiipput. Kommune Kujallermi 81%-usoq, Avannaata Kommuniani 75%-uvoq.
Kommunit akornanni tuluttut misilitsinnermi angusat assigiinngikkaluartut, tuluttut atuartitsinermi angusat atuartitsinernut allanut sanilliullugu qaffasissumik inissisimavoq.
Atuartitsissutit allat appasittut
Atuartut atuartitsissutinut allanut allanut, soorlu kalaallisut, matematikkimut qallunaatullu, sanilliullugit tuluttut angusaqarluarnerusarput.
Qallunaatut alloriarfimmi misilitsinnermi angusat 44,4%-upput, kalaallisut qaffasinnerulaarlutik 59,8%-upput, kiisalu misitsineq 41,4%-miippoq.
Ukiut atuarfiusut tamaasa apriilimi trintestimik taaneqartartumik misilitsittoqartarpoq, tassanilu atuartut ilinniartitsinermi anguniakkat naammassisimaneraat nalilersorneqartarpoq.
3. klassimi 7. klassimilu atuartut alloriarfimmi misilitsittarput.
