Trumpimut tapersersuisoq toqumik siorasaarneqartoq: - Kamannarpoq
Jørgen Boassen, Donald Trump Jr.-ip tikeraarnerani aaqqissuussisuusoq, Trumpimik tapersersuinini pillugu toqumik siorasaarneqarsimalluni Sermitsiamut oqaluttuaraa. - Kamannarpoq.
Jørgen Boassen
Foto: Arnaq Nielsen
Inuiaqatigiinni ikittunnguani politikkikkut oqallinneq misigissutsinik sakkortuunik pilersitsivoq. Allaat siorasaarinernik kinguneqartalersunik.
Tamanna Jørgen Boassenip nammineq timitarsivaa.
Donald Trump Jr.-ip tikeraarnerata kingorna Jørgen Boassen oqallisigineqangaatsiarpoq, maanna toqumik siorasaarneqartalerluni nammineq Sermitsiamut oqaluttuaraa.
Sermitsiamut oqaluttuarpoq Messengerikkut allagarsisimalluni, allaqqasumik "nalunngiliut toqulaaterlutit?"
- Kamannarpoq
Jørgen Boassenip oqarnera naapertorlugu politiit oqaloqatigisimavai, tunniussinissarlu eqqarsaatigalugu.
USA-mik suleqateqarnera, Trumpimillu tapersersuisuunini pillugu siorasaarneqarluni oqarpoq:
- USA suleqatigigakku, Trumpilu tapersersorlugu. Inuit ilai isumaqaramik nunarput tuniniariga, taamaattoqanngilaq, oqarpoq.
- Annilaangalersippaatit?
- Naamik, immaqa allaagaluaruma ersissagaluarpunga, ersinngilanga. Kisianni kamaammernarpoq. Allanik aamma siorasaarneqartarpunga, sulinissannut nukissanitsiinnarpaannga.
