Tunumi inuussutissat akii suli akisusut

Tunumi inuussutissat sivikitsumik atasinnaasut akii ukiukkut qaffangaatsiartarput, tassami nioqqutissanik taakkuninnga pilersuineq ullumikkut Islandimiit pisarpoq.

Tasiilamut nunaqarfiinullu inuussutissanik qulaani taaneqartunik ukiukkut pilersuinerup assartuineq eqqarsaatigalugu Islandimiit pinissaa naleqqunnerusoq KNI A/S naliliivoq.

Tamanna ilaatigut Naalakkersuisut paragraf 37 naapertorlugu Inatsisartunut ilaasortamut Mala Høy Kúkomut, Siumut, akissutaanni erserpoq.

Akit qaffasinnerusut

Tunumut, pingaartumik ukiukkut, nioqqutissanik pilersuineq ukiorpassuarni unammillernartarpoq, Mala Høy Kúkollu, Inatsisartunut ilaasortap Kommuneqarfik Sermersuumilu kommunalbestyrelsimut ilaasortap, Tasiilami nunaqarfiinilu ukiukkut qulimiguulimmik nioqqutissanik pilersuinissamut assartuinermullu pilersaarutit qanoq innersut paragraf 37 naapertorlugu ilaatigut paaserusuppaa.

Kalistat Lund, Inuit Ataqatigiinneersoq, Nunalerinermut, Imminut Pilersornermut, Nukissiutinut Avatangiisinullu Naalakkersuisoq, tamatumunnga atatillugu KNI A/S-imit akissutissarsiorsimavoq, ilaatigut ilisimatitsissutigineqarluni KNI A/S Kalaallit Nunaanni inoqarfippassuarnut, ilaatigut Tasiilamut nunaqarfiinullu, nioqqutissat pisiarineqarsinnaasut pillugit kiffartuussinissamik isumaqatigiissuteqartoq.

- Kiffartuussinissamut isumaqatigiissummi tassani KNI AIS tunngaviusumik nioqqutissanik, najugaqarfiup angissusia apeqqutaatillugu tuniniagaqarnissamut pisussaatinneqarpoq. Pisussaaffik taanna, tassungalu nioqqutissat, nioqqutissanut tunngaviusunut ilaasut akiisa aalajangersarneqartarnerat umiarsuakkut nassiussisarnermik tunngaveqarput. Nioqqutissanut tunngaviusunut inuussutissat sivikitsumik atasinnaasut ilaatinneqarput. Inuussutissat taakku atasinnaassusiisa ulluat qaangiukkaangat, KNI nioqqutissanik taamaattunik tuniniagaqarnissamut.

- Kisiannili timmisartuni qulimiguulinnilu inissaqartitsineq apeqqutaalluni Tasiilaq nunaqarfiilu ukiumi piffissani, umiarsuarsuit tikissinnaanngiffiini inuussutissanik sivikitsumik atasinnaasunik pilersorneqarnissaat KNI A/S-imit qulakkeerneqartarpoq, KNI A/S ilisimatitsivoq.

Ullumikkut pilersuineq Islandimiit ingerlanneqartarpoq, aammalu assartuussinermut akiusut umiarsuit atorlugit assartuussisarnermit akisunerungaatsiarput. Akit qaffaataat taakku kiffartuussinermut isumaqatigiissummit matussuserneqarneq ajormat, naggataagut tuniniaanermut akinut sunniuteqartarput, Mala Høy Kúkomut akissummi allassimavoq.

Pitsaanerpaaq

Ukiukkut Kitaanit Nuummiilluunniit nioqqutissanik pilersorneqaraanni tamanna najugaqartunut qanoq kinguneqarumaarnersoq Siumumi politikerip Tasiilameersup paaserusuppaa.

KNI A/S-illi Tasiilami nunaqarfiinilu inuussutissanik taaneqareersunik ukiukkut pilersuinissaq Islandiminngaanneeruni assartuineq eqqarsaaigalugu pitsaanerpaassasoq nalilerpaa.

- Nioqqutissat Nuummut assartorneqaqqaassappata (umiarsuarmik timmisartumilluunniit) saniatigut assartuussinermut ingerlasussanillu aaqqissuussinermut piareersaanermullu aningaasartuutit ilaneqartussaapput, kiisalu piffissaq assartuussiffiusoq sivisunerussappat, tamanna nioqqutissanik ullulikkanik kinguaatoortitsisinnaavoq. Tamanna naggataagut tunisinermut akiusup suli qaffasinnerulerneranik kinguneqartussaavoq, KNI A/S ilisimatitsivoq.

Tikittoqaqqissasoq

Tasiilami eqqaanilu inuussutissanik pilersuinermut tunngatillugu Naalakkersuisut sunik allanik pilersaaruteqarnersut Mala Høy Kúkop paaserusuppaa, tassunga atatillugu Royal Arctic Linep 2025-mut umiarsuarmik angalanissamut pilersaarutaani 2024-mut pilersaarutinut sanilliullugu Tasiilamut umiarsuarmik tikittoqarnissaa ilaneqarsimasoq Aningaasaqarnermut Akileraartarnermullu Naalakkersuisoqarfik ilisimatitsivoq.

- Tikittussap kingulliup 6.novembari 2025-mi pinissaa naatsorsuutigineqarpoq. Taassuma tikinnissaa sikunera peqqutigalugu umiarsuup tikinnissaata pinngitsoorsinnaanera sillimaffigalugu pilersaarutigineqarpoq. 2025-p kingorna Tasiilamut umiarsuup inuussutissanik pajulluni tikittarnissaanut pilersaarusiornermut Royal Arctic Linep novembarimi tikissinnaanissaa apeqqutaatinneqassaaq.

- Naalakkersuisunit paasineqarpoq, umiarsuit pilersuisut Kangianut tikittartut ilaneqarsinnaaneri killeqartoq. Taamaattumik Tasiilamut nunaqarfiinullu inuussutissanik pilersuinerup annertusineqarnissaa periarfissaqassappat, umiarsualivinnut allanut tikittartunik taamaatitsisoqartariaqassaaq, imaluunniit umiarsuit pisinnaasaannik annertusititsisoqartariaqassalluni, Aningaasaqarnermut Akileraartarnermullu Naalakkersuisoqarfik ilisimatitsivoq

Taamaammat Naalakkersuisut pilersuisoqaqqinnissaa aalajangiiffigitinnagu Tasiilamut pilersuinerup 2025-mi inernera utaqqivaat.

Aqqaneq-marloriarluni tikinneq

Islandimit nioqqutissanik sivisuumik atorneqarsinnaasunik pilersuinerup ingerlateqqinnissaa Naalakkersuisut qanoq pilersaaruteqarnersut apeqqutigineqarmat Naalakkersuisut KNI A/S-ilu imminnut akuliuffigineq ajortut, taamatuttaarlu KNI A/S-ip pingajuusullu akornanni niuernikkut isumaqatigiissutit ingerlatseqatigiiffiup suliassarigaa Kalistat Lundip ilisimatitsissutigaa.

- Naalakkersuisut aamma KNI A/S-ip akornanni akulerutinnginnissaq atuutsinneqarpoq, aammalu matumani KNI A/S-ip suleqataasullu allat akornanni ingerlatseqatigiiffiit akornanni niueqatigiinnissamut isumaqatigiissuteqartoqartarpoq. Akulerutinnginnissaq tamanna tunngavigalugu, Naalakkersuisut aamma KNI A/S-ip akornanni akisussaaffiit ersarissut immikkoortinniarlugit, taamaalillutillu ersarissarniarlugit Pilersuisup niueqatigiinnissamut isumaqatigiissuteqarfissai suussanersut pillugit Naalakkersuisut aalajangiisinnaanngillat, Nunalerinermut, Imminut Pilersornermut, Nukissiutinut Avatangiisinullu Naalakkersuisoq oqarpoq.

Royal Arctic Linep 2025-mi angalanissanut pilersaarutaani allassimavoq, taamaallaat umiarsuit ikittuinnaat Islandimiit Tasiilamut toqqaannarlutik angalaniartut. 2025-mi Reykjavikimiit Tasiilamut aallartussat 12-it pilersaarutigineqarput. Juunip aallartinnerani aallartussamut aatsaat sikut ajornartitsinngippata pisinnaavoq. Aallartussat taakku 3. juunip aamma 31. oktobarip akornanni sapaatit akunneri allortarlugit pisartussaapput. Matuma siuliani allassimasut, aammalu Naalakkersuisut naatitanik nutaanik Tasiilamut assartuussisarnissanik eqqortunik ilisimasaqannginnerat eqqarsaatigalugit, aallarfissani 12-iusuni taakkunani Islandimiit naatitanik nutaanik assartuussisoqarnissaa ilimanaateqarsinnaavoq, Kalistat Lund, Inuit Ataqatigiit, Nunalerinermut, Imminut Pilersornermut, Nukissiutinut Avatangiisinullu Naalakkersuisuusoq Mala Høy Kúkomut ilisimatitsivoq.