Tusagassiorfik: Partiit sisamat naalakkersuisunngortitsinissamut piareerput

Naalakkersuisoqatigiinnissamik isumaqatigiinniarnerit naammassilerput, partiinilu tallimaasunit partiit sisamat naalakkersuisoqatigiinnissamik isumaqatigiissummik tallimanngorpat atsiornissamut piareerput.

KNR-ip tamanna paasivaa. Maannalu Demokraatit siulittaasuata, Jens-Frederik Nielsenip tamanna ilumoortoq Sermitsiamut uppernarsarpaa.

Naalakkersuisooqatigiinnissamut isumaqatigiissut pilersaarutit naapertorlugit aqagu ullaap tungaani nalunaaqutaq aqqanernut kulturikkut illorsuarmi Katuami saqqummiunneqassaaq atsiorneqarlunilu, paasisagullu naapertorlugit, Naleraq, ataasinngormat isumaqatigiinniarnerni peqataajunnaartoq,  partiit tamarmik peqataaffigissavaat.

Naalakkersuisooqatigiit nutaat partiinit Demokraatinit, Siumumit, Inuit Ataqatigiinnit aammalu Atassummit pissappat, taava Inatsisartuni ilaasortanit 31-iusunit 23-nit tunuliaqutaqassapput.

Demokraatit qinersisartut 30 procentiinit qinerneqarlutik qinersinermi ajugaarujussuarput, partiilu naalakkersuisoqatigiinnissamik isumaqatiginninniarnerni siuttuusimalluni.

Partiip siulittaasua, Jens-Frederik Nielsen qinersinerup kinguninngua erseqqissaavoq sapinngisamik siammasinnerpaamik naalakkersuisooqatigiinnik pilersitsinissaq anguniaritsik, ilaatigut aamma nunatta USA-mit ataavartumik kimigiiserfigineqarneran eqqarsaatigalugu, tassami præsident Trumpip ataavartumik akulikilliartuinnartumillu uteqattaarpaa Kalaallit Nunaata USA-mit pigilernissaa aqutarilernissaalu sulissutigineqartoq.

Isumaqatigiinniarnerit ingerlanerini Siumup aamma Inuit Ataqatigiit Demokraatit peqatigalugit naalakkersuisooqatigiilernissamut tunngavissat suli qajannarpallaartut, maannali akimmiffiusinnaasut aaqqiissuteqarfigineqarsimarpasipput.