Tusagassiortutut ilinniagaq nalilersorneqarpoq
Tusagassiortutut ilinniarfik pitsanngorsarumallugu Ilisimatusarfik pingaarutilimmik alloriaateqaqqammerpoq. Ilisimatusarfik nittartakkamini taama allappoq.
Annonse
Tusagassiortutut ilinniarneq qanoq pitsanngorsarneqassava?
Inuiaqatigiinni pisariaqartinneqartut piumasaqaatillu allanngorartut eqquutsikkumallugit ilinniakkap qanoq pitsaanerpaamik nutarterneqarsinnaaneranik nukittorsaavigineqarsinnaaneranillu Ilisimatusarfiup misissuillutik nalilersuineq ingerlappaat.
- Qaffasinnerpaamik pitsaassusilimmik tusagassiortutut ilinniakkamik neqerooruteqarnissatsinnut ingerlaavartumik anguniakkatsinnut nalilersuineq qulakkeerinnittarpoq, tamanna ilinniartuutitsinnut pisariaqartinneqartunik piginnaasaqalersitsisarlunilu siunissami atorfininnissaannut ilisimasassaannik tunniussaqartarpoq, Ilisimatusarfik nittartakkamini allappoq.
Ukiorpassuarni ilinniartunik amigaateqarneq
Tusagassiortunngorniarfiup immikkoortortaqarfia ukiorpanni amerlanerit ilinniakkamut qinnuteqartinniarlugit pilerisaarutinik quppersakkanillu misileraanikuupput. Taamaakkaluartoq bacheloritut ilinniarfimmut qinnuteqartartut amerliartunngillat. 2019-imiit 2023-mut aqqanillit ilinniakkaminnik naammassinnipput.
- Nutaarsiassalerivinnut tusagassiortunik kajungilersitsiniarnerup ajornartorsiutaasa ilagaat, tusagassiortutut ilinniakkaminnik naammassinnittut atorfinnik allanik ujartuisarnerat, Ilisimatusarfimmi tusagassiortunngorniarfiup immikkoortortaqarfiani aqutsisoq, Naja Paulsen, siorna Sermitsiamut oqarpoq.
Ilinniakkap qulakkeernissaa taamaattumik Ilisimatusarfiup sulissutigissavaa:
- Anguniagarput ersarissuuvoq: silarsuarmi ineriartorfiujuartumut tusagassiortutut ilinniarfipput naleqquttuullunilu sillimmateqarluartuuginnassaaq - aammattaaq kinguaariinni tulliuttuni tusagassiortunik pikkorissunik sunniuteqarluartunillu ilinniartitsisarnerput attatiinnarneqassaaq.
Nalilersuineq naammassippat inerneranik avitseqatiginninnissaminnik qilanaarlutik Ilisimatusarfik ilisimatitsivoq.
