KNR-imi sulisut sulinerminni iluarisimaarinninnerannut misissuinermi takuneqarsinnaavoq sulisut pisortaminnut tatiginninnerat appasingaatsiartoq - sulisullu siorna soraartut aatsaat taamak amerlatigimmata tusagassiorfimmi inimi qullernik ikitsisinnaasut amerlagisassaanngillat.
Siulersuisullu ataatsimiittarfimmi qulliit tallimanngornermi ullaakkut nalunaaqutaq qulinut qulliit ikissavaat, tassani ajornartoorneq qanoq iliuuseqarfigineqassanersoq oqaluuserissagamikku.
KNR-imi sulisut sulinerminni iluarisimaarinninnerannut misissuinermi takuneqarsinnaavoq sulisut pisortaminnut tatiginninnerat appasingaatsiartoq - sulisullu siorna soraartut aatsaat taamak amerlatigimmata tusagassiorfimmi inimi qullernik ikitsisinnaasut amerlagisassaanngillat.
Siulersuisullu ataatsimiittarfimmi qulliit tallimanngornermi ullaakkut nalunaaqutaq qulinut qulliit ikissavaat, tassani ajornartoorneq qanoq iliuuseqarfigineqassanersoq oqaluuserissagamikku.
Siulersuisut matup tunuani pisortamut isornartorsiuinissaminnut piumasaqaatinillu sukaterinissaminut piareersassapput. Kingorna takussavaat ajunngitsumut saattoqassanersoq.
Kisitsisit ajorluinnartut
Sermitsiap Tusagassiuinermi Sulisut Peqatigiiffianni, TP-mi siulittaasoq Arnaq Nielsen attavigaat, KNR-imi sulisut sulinerminni iluarisimaarinninnerannut kisitsisit qanoq qisuariarfiginerai paasiniarlugu:
- Kisitsisit takusat ajorluinnarput, KNR-imilu ilaasortagut assut eqqarsaatiginaqaat. Suliffiup iluani ajorluinnartoqarnera sulisut nilliaatigigaat MTU-mi kisitsisini takutitassinni erserpoq.
Taassuma ilanngullugu oqaluttuaraa ajornartorsiut nutaajunngitsoq. Siorna 2024-imi sulisut 35-it qaammatit aqqanillit ingerlanerinnaani soraarniuteqarput.
Tassani tusagassiortut 15-it soraarniuteqarput, tassani arfinillit pisortaapput aaqqissuisuullutilluunniit. Siornalu apriilip qaammataani sulisut tallimat soraarput, ilaatigut radiomi pisortaq soraarluni.
Piaartumik iliuuseqartoqartariaqarpoq
Tusagassiuinermi Sulisut Peqatigiiffianni, TP-mi siulittaasup siulersuisut iliuuseqalersaarnerat iluarisilaarallarpaa.
- KNR-imi pisortaq erseqqissumik piumaffigineqarsimasoq siulersuisuni siulittaasup oqaatigaa, taannalu naammagigallarparput. Piumasaqaatimmi tallimanngorpat sukateriffigineqaqqissasut oqaatigaa. Tassunga killinneq nutaajunngimmat piaartumik iliuuseqartoqartariaqarpoq.
Siulersuisunulli kaammattuuteqarpoq:
- Siulersuisut pisortallu suliffimmi sinniisut akuutissagaat, killiffiullu ajornerulinnginnissaanut sunik pilersaaruteqarnertik taakkununnga oqaluttuarissagaat kajumissaarutigerusunnarpoq. Sulisummi sinniisaat taakkuupput suliffiup iluani suut ajornerannik ilisimaarinnilluartut.
Sulisunuinnaq ajornartorsiutaanngilaq, aammali inuiaqatigiinnut
KNR-imi ajornartorsiorneq KNR-imi sulisunut kisimi tunngitsoq, siulittaasoq oqarpoq. Aammali inuiaqatigiinnut ajornartorsiut tuppoq:
- KNR-imi ajornartorsiut ilaasortatsinnut kisimi tunngilaq, aammali nunatsinnut tuppoq. Nutaarsiassat ikilisinneqarnerat maanna ukiut pingajussaaniippoq. Aallakaatitassiat arlallit matuneqarnikuupput, nunatsinni oqartussaaqataanermut innarliivoq, ingammik massakkut qinersisoqalernerani, siulittaasoq naggasiilluni oqarpoq.
