Tusagassiuutit: Trumpip oqalugiaataata ataqatigiinngissutai Demokraatinut nutaarsiassatsialaavoq
"Ataqatigiinnginnerup eqqumilluinnartullu” Donald Trumpip allanngortinneqarsinnaannginneranut takussutissaavoq, isummersuummi allassimavoq
Trumpip oqalugiaataa Demokraatinut nutaarsiassaasoq nuannersoq præsident Barack Obamamut siunnersortaasimasoq David Axelrod CNN-imut oqarpoq.
Spencer Platt/Ritzau Scanpix
Republikanerit
præsidentissatut qinigassanngortitaata Donald Trumpip partiip
katerinnerani arfininngornermi oqalugiarnini toqutseriartoqarnera
pillugu nammineq misigisani killitsinnartumik oqaluttuaraa.
Toqutseriartoqaraluarpalluunniit
Trumpip kinaassusia allanngortinneqanngilaq.
Politicomi isummersuut
ilaatigut taama allassimavoq.
- Republikanerit arlallit
oqarput Trumpip toqoriaraluarneqarnini allanngussutigigaa. Trumpip
qineqqusaarnermini neriorsuutigaa katerinnermi ataatsimoornissamik
kajumissaarinerussasoq. Trumpip nammineq oqaatigaa oqalugiaatini
allanngortillugu, unammillertinilu, præsidenti Joe Biden,
eqqaaniarnagu, allassimavoq.
- Tamanna ilumuunngilaq.
Trumpi taamaaliunngitsoorsinnaanngilaq.
Oqalugiaat Politicomi
"ataqatigiinnanilu eqqumiitsutut“ allaaserineqarpoq, aammat
Trumpip toqoriaraluarneqarnini arlaannaatigulluunniit eqqarsaatinik
qaffakaatitsisimanngitsoq.
The New York Timesimi
allaaserinnittartup Trumpip ataatsimoornissamik eqqartuinini
ingerlaannaq taamaatikkaa maluginiarpaa.
- Trump 2020-rnisaq ullumi
takuarput, taanna asuli makkuluppoq, nipituuliorpoq
qinersisartuniillu imminut eqqartornerulluni, allassimavoq.
- Trumpi taanna ukiut
sisamat matuma siorna ajorsarpoq. Demokraatit kinaluunniit
sassartikkaluarunikku Trumpi ajugaaffigisinnaagaa sisamanngormat
misigaara.
Oqalugiaatip kingorna
Demokraatit nuna tamakkerlugu ataatsimiititaliaanni (DNC)
siulittaasup Jaime Harrisonip qinersisartut Trumpimut
mianersoqqullugit oqariartuutigaa.
- Donald Trumpip
Amerikamiut eqqaasippai sooq ukiut sisamat matuma siorna
qinersimannginnerannik — tassa sulisartunik soqutiginninnginnera
pissutigalugu. Imminut kisimi nuannaraaq, tusagassiorfik The Guardian
allappoq.
Trumpip oqalugiaataa
Demokraatit partiianni ajornartorsiortunut nutaarsiassaasoq
nuannersoq David Axelrod, præsident Barack Obamamut
siunnersortaasimasoq CNN-imut oqarpoq .
- Sapaatit-akunnerini
pingasuni kingullerni Demokraatinut pisoq una pitsaanerpaavoq,
oqarpoq.
/ritzau/
