KL

DK

Tusarniaaneq: Ullut erfalasulerfissat atorunnaarsinneqassapput, nutaalli atorneqalissallutik

Kunngeqalernermut atatillugu ullut erfalasulerfiusut Naalakkersuisut allanngortilluinnarniarpaat, tassani ullut erfalasulerfiusut nutaarluinnaat siunnersuutigineqarlutik allallu atorunnaarsinneqassallutik, tusarniaassutigineqartumi allassimavoq.

Nutaarsiassaqartitsisoq
Saqqummersinneqarpoq

Ulluni erfalasulerfissani piniartut, aalisartut meeqqallu siunissami ilaatigut ilanngunneqassapput, tamanna Naalakkersuisut tusarniaassutigineqartutut siunnersuutaanni atuarneqarsinnaavoq, tassanilu ullornik erfalasulerfiusussanik arfineq-marlunnik nutaanik atuutilersitsinissaq siunnersuutigineqarpoq:

  • Nunat Avannarliit ulluat (23. marts)
  • Tussiarfissuaq
  • Meeqqat ulluat (1. juni)
  • Nunat avannarliit Killiit ulluat (23. september)
  • Kunngissap Christianip inuuia (15. oktober)
  • Piniartut aalisartullu ulluat (15. november)
  • Ukiutoqaq (31. december)

- Nunat Avannarliit ulluat, Meeqqat ulluat, Nunat Avannarliit Killiit ulluat kiisalu Piniartut Aalisartullu ulluat ullut nalliuttorsiorfittut ullutsinni naleqquttutut, kalaallit ileqquinik, naleqartitaannik aamma Nunani Avannarlerni Nunanilu Avannarlerni Killerni nunat tamalaat ataqatigiinnerinik malunnartitsisutut nalilerneqarput, nalunaarutip allanngortinneqarniap, maanna novembarip 21-ata tungaanut tusarniaassutigineqartup, siulequtaani allassimavoq.

Ilanngullugu allanneqarpoq Tussiarfissuaq “Kalaallit Nunaanni ilagiit ulluattut naleqartillugu nalliuttorsiorfiusartoq, Ukiutoqarlu ukiup taarsinnginnerani ullorsiutigalugu malunnartinneqartarluni”, taamatullu aamma Kunngissap Christianip inuuia kunngissap allanngornerata kingunerisaanik malunnartinneqartalissalluni. 

Kunngissaq Joachim peerneqarpoq

Ukiumut ullut erfalasulerfiit amerlassusaat naleqquttuutinniarlugit, ullut erfalasulerfiit arfineq-marluk nutaat atuutilersinneqarnissaannut atatillugu ullut erfalasulerfiit atuuttut misissorneqareerneratigut ullut erfalasulerfiit uku atorunnaarsinneqarnissaat aalajangerneqarpoq:

  • Prinsesse Mariep inuuiani (6. februar)
  • Prinsesse Benediktep inuuia (29. april)
  • Prins Joachimip inuuia (7. juni)
  • Valdemarip ullua/ataatsimuuleqqiffik (15. juni).
  • Hans Egedep ullua (3. juli)

Taamatuttaaq “nunatta nunanik sanilerisanik ataqateqarneranik malunnartitsisut” nunat sanilerisat pingasut; Islandi, Nunavut Savalimmiullu, pisortatigoortumik ulluni erfalasulerfinni ilanngunneqassasut Naalakkersuisut siunnersuutigaat.

  • Islandimi inuiattut ullorsiorfik (17. juni)
  • Nunavut-ulluat (9. juli)
  • Savalimmiuni inuiattut ulloq nalliuttorsiorfik, Olaip ullua (29. juli)

Allamik erfalasulersinnaatitaaneq

Nutaatut ulluni inuiattut ullorsiorfinni taakkunani Erfalasorput atornagu paarlattuanik nunat erfalasuinik atuinissaq pisinnaatitaaffiussasoq pisussaaffiussasorlu siunnersuutigineqarpoq. Danmarkimi inuiattut ullorsiorfimmut, Inatsisitaarfimmut malittarisassap taamaaqataa siunnersuutigineqarpoq.

- Allamik erfalasulernissamut periarfissami naalagaaffeqatigiinnermi ulluni inuiattut ullorsiorfiusuni, tassa imaappoq Danmarkimi Savalimmiunilu inuiattut ullorsiorfinni, taama tulleriissillugit Dannebrog imaluunniit Merkið pisortat illorsuini tamani amuneqarnissaa piumasaqaataavoq. Paarlattuanik Islandip Nunavulluunniit erfalasuanik ulluni erfalasulerfinni pineqartuni Erfalasutsinnut taarsiullugit erfalasulertoqarsinnaavoq, tusarniummi allassimavoq.

Tamatuma saniatigut ulloq erfalasulerfik maajip aallaqqaataa pillugu allanngortoqassaaq. Manna tikillugu "Namminersornerulernerup eqqunneqarfianik / Sulisartut ulluannik" taagorneqareersoq "Sulisartut ulluannik" taaneqartalissaaq.

Erfalasup amuneqarnissaata piffissalernera

-  Tamatuma saniatigut nalunaarummi § 2-p allanngortinnissaa siunnersuutigineqarpoq, taamaalilluni erfalasup kingusinnerpaamik nalunaaqutaq 9.00 amuneqartarneranut malittarisassap attanneqarnera pissutigalugu erfalasoq siusinnerpaamik nal. 6.00 amuneqartassalluni.

Tusarniaanermut akissutit kingusinnerpaamik novembarip 21-ani ullup-qeqqanut uunga mailimut nassiunneqassapput: nsninatsit@nanoq.gl.

Qupperneq una toorlugu nalunaarut tamaat atuarsinnaavat.

samfund nordiske traditioner naalakkersuisut inuiaqatigiit grønland flagdage erfalasorput officielle helligdage

ATORFIIT Se alle jobs

Powered by Labrador CMS