Tusass 170 mio. koruuninik sinneqartooruteqartoq

Tusass 2024-mi sinneqartooruteqaqqippoq – tamatumuuna 170 millionit koruuninik, akileraarutit ilanngaatigereerlugit 127 millionit koruuninik.

2023-mi akileraarutit ilanngaatigereerlugit sinneqartoorutit assigilluinnangajappaat, siorna 124 millioninik koruuniullutik.

Tusassip ukiumoortumik nalunaarusiaa naapertorlugu ingerlatseqatigiiffimmit iluanaarutit 87,6 millionit koruunit Namminersorlutik Oqartussanut tunniunneqassapput. 2021-miilli ukiut tamaasa taamaaliortoqartarpoq. 2020-mi tunniunneqartut 112 millionit koruuniupput.

2024-mi kaaviiaartitat 797,6 millionit koruuniupput, tassa 26,0 millionit koruuninik ikileriarlutik.

Aningaasarpassuarik aningaasaliissoqassasoq

Tusassip ukiuni sisamani tulliuttuni periusissiaanut 1,9 milliardit koruunit angullugit aningaasaliisoqassasoq pisortaaneq Toke Binzer tusagassiutinut nalunaarummi oqarpoq:

- Siornatigullu periusissiami aningaasaliiffissaasimasut sanilliutissagaanni 1 mia. koruunit anguniagaasimallutik. Taamaammallu aningaasatigut angusat pitsaasut aammalu aningaasat tigoriaannaat pitsaasimasut nuannaarutigaarput. Tamatumalu saniatigut inuiaqatigiinnut akileraarnikkullu tunniussinnaasimasagut 135 mio. koruunit sinnersimallugit, Toke Binzer oqarpoq.

Nuummi qarasaasiaqarfissuassaq sanaartorneqarnissaaq, Qaqortumiit Aasiannut Ilulissanullu immap naqqatigut kabelimik sillimmatissamik suliaqarneq ilaatigut aningaasaliiffigineqassasut Tusass paasissutissiivoq.

Akit appariarnerat siulersuisuni siulittaasup nuannaarutigaa

Tusassip ukiup ingerlanerani angusaasa ilaat tassaavoq qaammataasanut attaveqarnermut akit appartinneqarnerat, tamannalu siulersuisuni siulittaasup Ulrik Blidorfip nuannaarutigaa:

- Nuannaarutigaarput akit annertuumik appariarsimanerat satellitsikkut sumiiffinni, tassanilu atuisinnaanermut akiliut angisooq akikinnerulersimavoq assigalugu sukkassuseq qaffariarsimavoq. Taamatuttaaq atuisinnaanermut akiliut mikisoq allanngortinneqarpoq, tassanilu marlunnik immikkoortut ataatsimut kattunneqarput nunami tamarmi akit appasinnerpaaffianni. Piumasaqaat tamanna kinguneqarpoq innuttaasut amerlasuut internettimik atuisinnaalersimanerat.

- Qaammataasatigut atuisuuffik annermut akit annikillingaatsiarsimasinnaaneri tamatumalu saniatigut sukkatsinnerusinnaaneri nuannaarutigaarput, Ulrik Blidorf oqarpoq.

Tusass qallunaallu illersornissamut attaveqaasersuinermut isumaqatigiissutissamut sinaakkutissamik siorna isumaqatigiissusiortoqartoq aamma oqaatigaa.

- Illersornissaqarfik Tusassimut inniminneereersimavoq, tassa Aasianni sanaartorneq aammalu attaveqarfimmik ingerlatsinissaq, tamannalu siunissamut isumalluarnarpoq. Nunatsinni taamatut aningaasaliinerit pisariaqartippagut, Ulrik Blidorf oqarpoq.