Tusassip ukiup affaani siullermi 74,4 mio. kr. iluanaarutigigai
Allakkanit poortukkanillu isertitat kaaviaartut 6 procentinik ikileriaraluartut Tusassimi kaaviaartitat ukiup affaani siullermi taamaaginnarpoq.
- Ukiup affaani matumani illoqarfinni annerusuni inoqarfinnilu minnerusuni sukkassutsinik qaffasinnerpaanik neqeroorsinnaasimavugut, taamaaliornikkut sullitavut ulluinnarni pitsaanerusunik attaveqarsinnaallutik. Periusissiatta nutaap atulersinnerani inuiaqatigiillu digitaliusut pitsanngorsaaviginissaannut sulinermi alloriarnerit siulliit pingaaruteqarput, Tusassimi pisortaaneq Toke Binzer oqarpoq. Taann Royal Greenlandimi decembarip aallaqqaataani pisortaaninngussaaq.
Assi: Oscar Scott Carl
Tusassimi akileraarutit suli ilanngaatiginagit ukiup affaani siullermi angusat qaffarialaarput.
Namminersorlutik Oqartussat allakkerinermik attaveqaqatigiinnermillu ingerlatsivianni akileraarutit suli ilanngaatiginagit 74,5 millionit koruuninik angusaqartoqarpoq, 2024-mi piffissami tamatumani 67,5 millionit koruuninik angusaqartoqarnikuulluni.
Ukiup affaani siullermi kaaviiaartitat 2024-mi kaaviiaartitat amerlaqqatigaat, tassa 395,6 millionit koruunit.
Allakkanik poortukkanillu nassiussinermi kaaviiaartitat 6 procentinik apparsimasut ukiup affaanut nalunaarusiami atuarneqarsinnaavoq. Aningaasanngorlugit 2,4 millionit koruuninut.
Allakkanik nassiussinerup frimærkinillu tuniniaanerup appariartornera pissutaavoq, annaasaqaatillu ilaat ukiup affaani kingullermi matussuserneqarsimavoq.
160-170 millionit koruuninik isertitaqarnissaq naatsorsuutigineqarpoq
Akerlianilli 2025-mi ukiup affaani siullermi suliffeqarfiup akit aalajangersimasut pillugit isumaqatigiissutai kaaviiaartitallu allat 6,4 millionit koruuninik qaffariarput.
Tusassip ukiup affaani siullermi sukkanerusumik attaveqaasersuisimanera pisortaanerup Toke Binzerip eqqaavaa:
- Ukiup affaani matumani illoqarfinni annerusuni inoqarfinnilu minnerusuni sukkassutsinik qaffasinnerpaanik neqeroorsinnaasimavugut, taamaaliornikkut sullitavut ulluinnarni pitsaanerusunik attaveqarsinnaallutik.
- Periusissiatta nutaap atulersinnerani inuiaqatigiillu digitaliusut pitsanngorsaaviginissaannut sulinermi alloriarnerit siulliit pingaaruteqarput, pisortaaneq Toke Binzer oqarpoq.
2025-mi angusat suli akileraarusernagit 160-170 mio. koruuniunissaat Tusassimi naatsorsuutigineqarput. 2024-mi taama aamma angusaqartoqarpoq.
